Gestio
Geographia
Cremifanum (Theodisce: Kremsmünster) est commune (cum titulo insigni „Marktgemeinde“, i.e. commune mercatus) Austriae Superioris 6435 incolarum (die 1 Aprilis 2009). Cremifanum in circulo Kirchdorf ad Cremisam situm est.
Abbatia Cremifanensis, quae in clivo super medio foro sedet, monasterium Benedictinum est, anno 777 a Tassilone III., duce Bavariae, fundatum. Anno 1299 vicus Cremifanum primo in litteris apparet. Anno 1489 ab imperatore Friderico III. ad mercatum elevatus est. Gymnasium monasterii inter scholas antiquissimas Austriae numeratur. Observatorium monasterii annis 1748-1759 erectum primum caeliscalpium Europae dicitur [1]. Anno 1910 Cremifani prima electrificina aedificata est.
Descriptio: In viridi niger aper prosiliens, rubris ungulis oreque, dentibus argenteis, aureo venabulo fracto transfixus, e rubro vulnere sanguinem fundens.
Insigne legendam fundatoriam Cremifanensem revocat narrantem ducem Tassilonem III. monasterium ad Cremisam (quare Cremifanum) illo loco condidisse, ubi filius Guntherus, a dentibus apri, quem venabulo sauciavisset, percussus e vita decessisset.
Coniunctio cum communi Praenestino non decreto sancita, sed in veneratione utriusque communis erga Sanctum Agapitum martyrem, qui olim Praenesti cruciatus nunc in Abbatia Cremifanensi requiescit, fundata est, qua de causa crebrae peregrinationes visitationesque huc illuc fiunt.