|
Epsilon[1] (Palaeograece ἒ ψιλόν, Neograece έψιλον, maiusculum Ε, minusculum ε) est quinta alphabeti Graeci littera. Ex he 𐤄, littera Phoenicia, ortum, E, litteram Latinam, et Е, litteram Cyrillicam, peperit. In Graeco numerorum systemate, quinque vel quintum denotat.
Linguâ antiquâ ē (Graece εἶ) appellabatur, sed post mutationem soni saeculi secundi aerae vulgaris nomen e psilon creatum est ut haec littera ab ae diphthongo (αι δίφθογγος) distinguatur.[2] Latine etiam e brevis vel e pente (πέντε, hoc est "quinque") appellatur.[3]