In de buurt zeen opgravinge, die truk gaon nao de tied van de Bandkeramiekers, die hie rónd 5000 v. Chr. woonde. De boere waore aafkómstig van Boheme en Moravië.
De Romeine houwe hie 'ne Romeinse villa en 'n begraafplaats. Ouch de Franke en Merovingersj höbbe hun doaje begrave op 't plateau in 't Maasdal bie Aelse .
't Hudige dörp is van Middelièwse oarsjpróng. In de 12e ièw boèwde de hière van Aelse 'n börch. De reste ligke in de Maas.
De luuj verdeende vreuger hun brwad mèt sjeepvaart op de Maas. 't Hoes van Jan Coninx, dae helsjtein oet Name verveurde, bevunk zich baove op de Maasberg.
Opmerking: Bie de volkstèlling van 1971 zeen de ciefers op ganse vieftalle aafgerund. Gelèt op 't klein aantal inwoeners van Aelse is 't greujciefer veur dat jaar op ganse percènte aafgerund.
De volgende sectie van dit artikel is gesjreve in 't Mestreechs.
De gemeinte Aelse kraog op 21 november 1888 vaan d'n Hoege Raod vaan Adel e waope touwgekind (zuug de tabel veur e printsje), wat ziech zoe liet besjrieve:
In sinopel (greun), bezejd mèt elzetekskes, de H. Maag Maria, in natuurleke kleur, mèt kroen en nimbus vaan goud en gekleid in zèlver (wit), op de rechtererm dragende 't kinneke Zjezus, mèt e kleid vaan zèlver, mèt 'ne nimbus vaan goud en, vashawwend aon 'n koord vaan keel (roed) twie sjuinsgezatte sjèldsjes, dat aon de rechterkant (veur de beziener links) vaan keel belaoje mèt drei kepers vaan goud, en dat aon de linkerkant vaan keel mèt 'ne paol vaan goud, belaoje mèt drei kepers vaan sabel (zwart).
De elzetekskes zien sprekend: ze beelde de lètterleke beteikenis vaan de (Nederlandse) naom es 'bos vaan elze' oet. Maria is zeker sinds de zestienden iew sjötspetroen vaan Aelse. De sjèlder zien vaan Gavre ('n hierlekheid boevaan de hiere langen tied ouch euver Aelse heersde) en vaan de aw hierlekheid Aelse. De Maria mèt twie sjèlder in de hand vörmde in vreuger tije 't zegel vaan de hierlekheid.[16]
Bezeenswaerdig
Aelse is besjermp dörpsgezich mèt monumentaal pande in de Dörpssjtraot, op de Maasberg en Op d'n Berg.
'n Gedeilte van oud Aelse is aafgebraoke bie de aanlèk van 't Julianakanaal (1925-1935).
De Heilige Augustinuskèrk oet 1848 door architect Dumoulin. 't Baksjteine geboew haet klassieke elemente. Bènne sjteit 'n houte Anna-te-drieëbeeld oet 1525 gemaak door 'de Meister van Aelse, wavan nog mjeh werke bekènd zin. Wiejer zin nog te zeen de beelde van de heilige Catharina en Sinteberb, 't 13e jews "houte kruus van Katsep" en 'n Miedelièws doupvont. Aansjtwatend bevingk zich nog 'ne apaarte Maria devotiekapel.
Op de kruusing van de Raodhoessjtraot, Kaaksjtraot en Dörpsjtraot sjteit 'n neogotisch kapelke, oet de 19e ièw, gewiejd aan Slevevrouw van Lourdes. 't Gebuuwke (rieksmonument) is opgetrokke oet veldbrandsjtein op de plaats woo in vreuger jaore 'ne sjanpaol haet gesjtange. Veurdat 't hudig beeld in 't kapelke kaom te sjtaon sjtinge d'r versjeie anger beelde: 'n houte crucifix en tot 1995 'n Heilig Hartbeeld. Binne hingk ouch nog e klein houte kruus, dat in 2004 op wónderbaarlike wies ies euvergebleve oet 'n aafgebrend hoes.
Naeve de kapel sjteit de ouw dörpspómp.
Kesjtièl Elsloo. Van warsjpróng 'n broewerie woort 't in de 17e ièw verboewd tot kesjtièl door de Hièr van Aelse, graaf Nicolaas d'Arberg Valengin. Bie 't complex werre ouch 'n watermeule, 'ne haof en 'n wenjelpark mèt heemtuin. In de Maasbedding ligke de reste van 'ne börch van Aelse, die in de 51 e jew door de Maas is euversjtruimp.
de inpandige Sjlekmeule (watermeule) op de Sjlekbaek sjtamp oet 1552.
Graafkapel van de grafelike familie Geloes van 't kesjtièl.
Sjtreekmuseum Sjippersjbäörsj oet de 17e jew.
Dörpsvereiniginge
Fanfare De Maasgalm
Heemkundevereiniging De Maasstreek
Carnavalsvereiniging de Sajelaire
Starlight twirl vereiniging
Dialek
In 2000 versjeen de platte Aelsenaer, de dictionair van 't Aelser plat oet de jaore veur 1940-1950 en vreuger van de hand van J.G.G. Cobben.