Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Broksele (officieel Broxeele, in 't Nederlands soms ouch Brokzele gesjreve) is e dörp en 'n gemeinte in 't Frans Noorderdepartemint, in Frans Vlaondere, arrondissemint Duinkerke, kanton Wormhout, mèt 399 inwoeners in 2019.
Broksele ligk nog zjus in 't Bloetland, 't noordelek polderland vaan Frans-Vlaondere. De gemeinte grens mèt de klok mèt aon Bollezele, Rubroek, Buisscheure, Lederzele en Volkerinkhove. Broksele is e klei kèrkdörp wat direk aon d'n departementaole weeg D211 ligk. Kortbij 't dörp ligke de bronne vaan d'n IJzer, die me es e klei beekske euverstik es me nao Rubroek geit.
Broksele is in 1072 veur 't iers vermeld, es Brocsela, en liet ziech gemekelek verklaore es 'zaolboerderij in 't moeras (brook)'. Heimèt is de naom etymologisch identiek aon dee vaan Breusel (Bruocsella in de vreug middeliewe); um die rei zien de twie gemeintes in d'n twintegsten iew gezjumeleerd.
jaor | aontal | jaor | aontal | jaor | aontal | jaor | aontal | jaor | aontal | ||||
---|---|---|---|---|---|---|---|---|---|---|---|---|---|
1793 | 304 | 1851 | 350 | 1891 | 364 | 1936 | 264 | 1999 | 269 | ||||
1800 | 303 | 1856 | 342 | 1896 | 336 | 1946 | 262 | 2006 | 306 | ||||
1806 | 410 | 1861 | 335 | 1901 | 334 | 1954 | 265 | 2010 | 304 | ||||
1821 | 395 | 1866 | 344 | 1906 | 327 | 1962 | 249 | ||||||
1831 | 411 | 1872 | 376 | 1911 | 292 | 1968 | 209 | ||||||
1836 | 407 | 1876 | 373 | 1921 | 279 | 1975 | 190 | ||||||
1841 | 405 | 1881 | 357 | 1926 | 280 | 1982 | 211 | ||||||
1846 | 362 | 1886 | 362 | 1931 | 268 | 1990 | 270 |
't Veurnaomste monumint in 't dörp is de gotische Sint-Kwintenskèrk. Op de kèrkef is e Brits oorlogsgraaf te vinde. 'n Aander monumint is 't raodhoes. 't Bezunderste punt vaan 't dörp is evels 't Menneke Pis. Dit is 'ne replica vaan 't bereump Breusels beeldsje, in 1979 door de stad Breusel aon häör klein zöstergemeinte gegeve en ei jaor later geïnstalleerd.[1] Vreuger stoont 't Menneke aon de 'groete' weeg, sinds 2011 evels veur 't raodhoes.[2] 't Menneke kin pisse, al heet me daoveur wel zie gemech mote doorbaore.
Traditioneel weurt in Broksele Frans-Vlaoms gesproke. Door zien westeleke ligking liekent 't plat vaan Broksele relatief wieneg op 't Wes-Vlaoms oet 't Belsj. E kinmerk vaan Broksele en 'n aontal aander dörper in de umgeving is de infinitief op -e (in plaots vaan -en), wat rappeleert aon 't Fries, Wes-Fries en Ziews.[3]
Broksele dreug 't volgend waope:
Dit artikel is gebaseerd op de Nederlandstaolege en Franstaolege versies.