Bung (Nederlands Bunde) is 'n kern bie de Geul en 't Julianakanaal in de gemeinte Meersje in Nederlands Limburg. Tot 1982 waor 't 'n zelfsjtandige gemeinte.
In vreuger jaore ouch waal Bundt, Bunn, Bunna (Latien), Buonde en Bonde geneump. In 2014 haet Bung 5.817 inwonersj.
De nuu kèrk van Bung, die in 1960 is geboed in plaats van de aw St. Agneskèrk, in Maaslandse barok, is ouch gewied aan de heilige Agnes, de patrones van kuisheid, kinger van Maria, maagde en tuinmanne. Ze is oontworpe door de architekte Fanchamps en Van der Pluym. De kruusweegsjtasies woorte gemaak door de Limburgse kunstenaer Martin Linnartz. De Glaas-in-betonvinsters zin van de Bunger kunstenaer Daan Wildschut. Wiejer sjteit 'r 'n MaaslandsMadonnabeeld, dat vermoedelik oet de 14e ièw sjtamp. 't Beeld van de Heilige Agnes aan d'n ingank is van de Bunger kunstenaer Rob Stultiens.
De aw kèrk, oet 1828, woort nao 1960 gebruuk es constructiewèrkplaats en is sinds 1993 in gebruuk es cultureel centrum de Aw Kèrk.
Aan de Heiligenbergsjtraot sjteit Hoes Heiligenberg, ouch oet de 18e ièw, geboed van baksjtein mèt op de heuk mergelblokke.
De Bungerbosj is de sjtijlste hellingbosj van Nederland mèt huègdeversjille tot 80 maeter. Dizze bosj haet 'n unieke natuurhistorische waerde, want 't is d'n einigste bergbeekbosj van Nederland. Vaöl versjillende flora, wie Aronskelk, Annemoon en Kèrkesjleutel in de hol waeg, en fauna, oonder andere de vuursalamander, koome hie veur. 't Gebied is, wie gezag, riek aan bronne en beekskes. Mèt d'n aanlèk van 't sjpoor is de bosj euverlangs in tjwiè gedeiltes gesjplits. De vaöle beekskes zin via ei paar dukersj oonder 't sjpoor doorgeleid nao d'n andere kant, woa de beekskes vreuger e drassig gebied veroorzaakde aan de westelike kant van 't sjpoor, vreuger ouch bekind es De Binde (de beemden).
Bung haet 'n sjtasie aan de sjpoorlien Mesjtreech-Zittert. 't Tegewoordig sjtationsgeboe is van 't type sjtandaard Douma.
In naovolging van Het Dorp (in Arnhem) is in Bung de tjwiède woongemeinsjap veur lichamelik gehandicapte, Geuloord geboed. Ouch boete 't terrein van Geuloord zin noe woninge, woavan de bewoonersj oondersjteund weure in 't kader van "Begeleid Zelfsjtandig Wone".
Waope
De volgende sectie van dit artikel is gesjreve in 't Mestreechs.
Gedeild: I. in zèlver (wit) 'nen umgewenden dobbelstartege liew vaan keel (roed), gekroend en genageld vaan goud (gell); II. in zèlver veer dweersbalke vaan keel, dao-euverheer 'nen dobbelstartege liew vaan sabel, gekroend, getongk en genageld vaan goud. 't Sjèld mèt de rechterhand gehawwe door de dao-achter gezatte figuur vaan de H. Agnes, maag en marteleres, in e wit kleid, op de linkererm e lam dragend, alles in natuurleke kleur.
De twie deile vaan 't waope stoon veur Valkeberg en Gebrook, hiere vaan Bung respectievelek veur en nao 1626. Agnes is de petroenheilege; 't lam (Gaods) is häör attribuut (sprekend: agnus - Agnes), meh volgens Sierksma (1962) ouch 'n verwijzing nao d'n Allerheilegste Verlosser, aon wee de vreuger dörpskèrk waor gewijd. 't Kaom al veur op aw zegele vaan 't dörp.[3]
Historische inwoenertalle
Bung greujde 't groetste deil vaan zie bestoon gestiedeg. Vaanaof 1960 zuut me de gemeinte oetgreuje tot 'n veurstad vaan Mestreech.
In 1971 woorte de inwoenertalle op ganse vieftalle aofgeroond. Gelèt op de neet al te groeten umvaank vaan Bung is daorum 't greujciefer veur dat jaor neet exakter es in ganse percinte gegeve. In tiende perceis is dit ciefer +64,1%.
