Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
'nen Derby (oetspraok /dɑː(ɹ)bɪ/, /dɜː(ɹ)bɪ/ of /dæʁbi/) is 'ne sportmatch tösse twie teams oet dezelfde plaots of regio. 't Begrip heet ziech oontwikkeld oet de naom derby veur bepaolde peerdrenne; boete de Ingelstaolege wereld is de hei besjreve beteikenis intösse gemeingood.
Derby's zien oonvermijdelek in competities die mer e klei gebeed bestrieke, meh oontstoon bij touwval in lendeleke competities. Zoe speule in de Nederlandse Ieredevisie hierevoetbal allewijl (2016/17) drei clubs oet Rotterdam.
Veural bij populair sporte kinne derby's zwaor belaoje zien. Twie plaotse die kort bijein ligke höbbe dèks 'ne meujeleke band, wat doorwèrk in de mentaliteit vaan de supporters. Binne ein stad of dörp hure supporters vaan 'n bepaolde club dèks bij ein bevolkingsgróp ('n religieus gemeinsjap, sociaol klasse of stadsdeil) en kin de derby verboonde zien mèt 'ne klassestrijd. De anomisiteit tösse de supporters löp vaan plaogerije tot echte vijandsjap. Derby's hure ouch daorum dèks tot de bès bezochte matches vaan 'n club.
Alle besjreve matches betrèffen 't hierevoetbal.