Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

De term geslach kint in de grammair nao drei dinger verwieze: 'n klasse vaan substantieve, 'ne vörm wat aander lexicaal categorieë - veural artikele, adjectieve en aonwiezende pronome - door congruentie kinne aonnumme, en 't gebruuk vaan verwiezende en bezitteleke pronome.

De meiste taol ongersjeie drei grammaticaal geslachte: mannelek, vrouwelek en oonzijeg. Allewel bij wäörd die manslui/vrouwlui en manneleke/vrouweleke bieste besjrieve dees twie dinger in princiep euvereinstumme, gief 't gein noodzakelek verband tösse 't grammaticaal en 't biologisch geslach; in 't Duits en Limburgs beveurbeeld zien das Mädchen en 't maedje oonzijeg. In sommege aander taole wie 't Ingels en Esperanto zien alle neet-levende dinger grammaticaal onzijeg.