Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Genhout (Nederlands: Groot Genhout) is 'n dörpke in de gemeinte Baek op 't plateau in Zuud Limburg. Lokaal weure Groat Genhout en Klein Genhout es ein plaats Genhout besjouwd: same haet Genhout 1211 inweunersj (2019). Op 'n wiet plaatsnaambord sjteit in 't plat: Groat Genhout. Miedenin dees twiè kerne, die same de parochie Genhout vörme, sjteit de parochiekèrk. De naam Genhout beteikent: in den hout. (hout is hie bedoeld es bösj). In 2002 haet Genhout 1300 inweunersj. Genhout, gelege tösje Baek en Sjpawbik weurt ouch waal Baeker Genhout geneump um zich te óndersjeije van Arensgenhout bie Hölsberg. Hie bevingk zich 'n buurtsje mèt dezelfde naam: Kleingenhout.

Bezeenswaerdig

• Sint Hubertuskèrk, ouch waal de kèrk van de Limburgse kunstenaersj geneump, is geboewd in 1937 ónder architectuur van Alphons Boosten oet Mestreech. De Limburgse kunstenaersj die höbbe mètgewèrk zint: Henri Jonas, Charles Eyck, Joep Nicolas, Charles Vos, Gisèle Waterschoot van der Gracht, Jacques Verheyen, Jef Scheffers, Yvonne Trypels. 't Geboew is opgetrokke oet Baeker gaele baksjtein en de 42 maeter hoage tore haet 'n opvallend greunkopere sjpitsdaak.
• 't Oorlogsmonument in de buurt van de kèrk oet 1955 is gemaak door Frans Timmermans
• Twiè monumentaal Printhager häöf: eine (de Óndersjte) oet 1744 mèt bakhoes en (de bovenste) oet 1806. De Óndersjte haof is gesitueerd rónd twiè pleije. 'ne Tösjegevel besjteit oet gedeiltelik vakwerk, baksjtein mèt sjpeklaoge, mergele hookblök en gezjwenkde tuupgevel. 'n Inscriptie geuf de lèttersj IMCW 1744. De bovenste boerderiej besjteit oet drie losse geboewe rónd 'ne plei. De meiste ónderdeile datere van de 19e ièw, behalve 'n helsjteine kruusvènster en de geprofileerde mergele daaklies.
• Diverse ouw häöf en vakwerkhoezer
• Sint Hubertuswindmeule oet 1802 is van 't type sjtanderdmeule en getummerd van hout. Ze liek op de huègde aan de waeg van Sjömmert nao Baek aan de N 584. In 1971 is de meule eigendóm van de gemeinte gewore. 't Maalwerk weurt gereigeld gebruuk.
• Sculptuur van Caius Sproncken oet 1994

Dörpsvereiniginge

• Fanfare Sint Antonius
• Carnavalsvereiniging de Sjravelaire oet 1974

Gemeinte Baek
Dörper: Baek | Groat Genhout | Geverik | Klein Genhout | Nirbik | Sjpawbik
Buurtsjappe en gehuchte: De Aw Kèrk | Hoebelrao | Hoeve | Kelment | Looiwinkel | Sint-Jansgelaen