ZE
|
Sta pagina a l'é scrita in zeneise, segondo a grafia unitäia |
I raggi X, raggi ixe, (ò raggi Röntgen) l'en quella porçion de spettro elettromagnetico con longhixe d'onda compreisa ciù ò meno tra 10 nanòmetri (nm) e 1/1000 de nanòmetro (1 picòmetro), clascificæ comme radiaçioin ionizzante, scicomme o gh'à un poei de penetraçion ben ben elevou: solo druesse de l'ordine di çentimetri de ciongio ò de deçimetri de cäsestruzzo peuan fermâli.
À longhixe d'onda supeiô à 0,1 nm l'en ciammæ raggi X mòlli; à longhixe minoî, l'en ciammæ raggi X drui. I raggi X drui i s'assomeggian a-i raggi gamma, ciù energetichi, ma i l'en distinti da lê à segonda da seu origine: i fotoin X l'en produti da variaçioin da cinetica di elettroin, mentre quelli gamma da transiçioin e decadimenti à l'interno de un nucleo atòmico (origine nucleâ), ò da l'annichilaçion tra un positron e un elettron.
L'en deuviæ sorviatutto pe fin medichi (pe mezo de radiografie), inte l'analixi chimica co-a spettrofotometria XRF e inte l'analixi da struttua di materiæ co-a cristallografia à raggi X e co-a spettroscopia de asciorbimento di raggi X. E riçerche pontan à mette in vixon struttue in vivo delongo ciù menue e into laboratoröio se arriescian à razzonze resoluçioin de 62 nanòmetri.
I raggi x son de onde elettromagnetiche, coscì comme i Raggi gamma. Caratteristica di raggi x a l'è quella de ëse emissi da l'atomo in conseguensa da transiçion di elettroin da un orbitâ ciù esterno a un ciù interno .
Into spedî un fascio de elettroin acceleræ contra un bersaggio, un metallo pesante, se genera di raggi x inte unna mainea artifiçiâ. Questo fenomeno o se ciamma radiaçion de frenamento perchè o l'è dovuo a-a deceleraçion subia da-i elettroin into piccâ.
O vantaggio di raggi x artifiçiæ o consciste into fæto che se peuan emette solo a-o momento chi se rendan neçessäi (comme pe utilizzâli inte l'ambito da meixiña ò inte l'industria ascì). A-o conträio, l'emiscion de Raggi gamma a no peu ëse controllâ da feua. I raggi x artifiçiæ l'en deuviæ into campo medico, segge pe-a diagnoxi (radiologia de diagnoxi), pe-a cua (radioterapia) che pe-o deuvio comme ghia e contròllo de atre proçedue invaxive (radiologia de intervento) .
L'é l'arvî do 1887 quande o Nikola Tesla o l'incomensa à studiâ i raggi X deuviando tanto i seu appægi quante e canæ de Crookes. Da-i seu reisoconti tecnichi, intendemmo ch'o là inventou e realizzou unna canâ particolâ a-i raggi X con un solo elettrodo. E canæ do Tesla l'ean despæge da-e atre pe no avei un elettrodo bersaggio. Lê o l'à spiegou tutto questo inta seu leçion in scî raggi X do 1897, à l'Academia de Sciense de New York. O termine moderno pe questo processo l'é dito "bremsstrahlung", donde unn'emiscion segondäia de raggi X energetichi a vëgne produta quande particelle carreghe (pe fâ un exempio elettroin) passan pe mezo da matëia. Into 1892 o Tesla o l'aveiva compio numeroxi esperimenti in tâ senso, ma o no l'à reiso pubrico i seu resurtæ. I seu esperimenti de ciù avanti o portian à avvertî a communitæ scientifica pe primmo di rischi biologichi connesci à l'espoxiçion di raggi X.
O Hermann von Helmholtz o l'à formulou unna descriçion matematica di raggi X. O l'à ipotizzou unna teoria da disperscion primma ch'o Röntgen o fesse e seu scoverte e annonçi. A seu formola a l'ea basâ in sciâ teoria elettromagnetica da luxe.
O William Crookes o là investigou in scî effetti de scarreghe de energia in gazzi nòbili. O l'à construio quello che ancheu o vëgne ciammou unna canâ de Crookes, dapeu evolua inta canâ radiògena: un çilindro de veddro a-o quæ interno gh'é o veuo, ch'o contëgne di elettrodi a-i quæ vëgnan applicæ de corrente à erta tenscion. À prescion ambientâ lê o l'emetteiva da luxe vixibile, ch'a variava de smersa co-o decresce da prescion, fiña indebolîse sotta veuo sponciou, pe dapeu asmortâse. O l'aveiva fæto caxo che, disponendo de pellicole fotografiche da vexin a-a canâ, ghe n'ea de quæ che vegnivan imprescionæ, ma o no l'à investigou de ciù in sce questo aspeto. Defæti, inta realtæ l'emiscion luminosa a no se interrompeiva comme o l'aveiva creduo, ma a diventava invixibile solo à l'euggio uman (dæto che i raggi emissi ghe passavan pe mezo).
Into 1892, o Heinrich Hertz o l'à dimostrou che i raggi catòdichi poeivan passâ pe mezo di feuggi de metallo ben ben sottî (comme l'alluminio). O Philipp von Lenard, un studente do Hertz, o l'à continuou à investigâ. O l'à sviluppou unna neuva verscion da canâ catòdica, e o l'à studiou a penetraçion di raggi X pe mezo de varri metalli. O Lenard, però, o no s'à reiso conto da natua da radiaçion ch'o l'ea apreuvo à produe, ch'o pensava a-o conträio ch'a fïse de unna mersa conosciua.
A-i 8 de novembre do 1895 o Wilhelm Röntgen, un sciensiou todesco, o l'à incomensou à osservâ di raggi X intanto ch'o sperimentava co-e canæ à veuo, uña de quæ a l'ea o modello avansou construio primma da-o Lenard. O Röntgen o l'à scrito a-i 28 de dexembre do 1895 un rappòrto preliminâ "In sce unna neuva smersa de raggi: unna comunicaçion preliminâ". O l'à spedio a-a rivista da Physikalisch-Medizinische Gesellschaft de Würzburg. O l'è stæto o primmo annonçio formâ e pubrico di raggi X. O Röntgen o l'à ciammou a radiaçion "X", pe indicâ ch'a l'ea ancô de smersa desconosciua. O nomme o l'é rimasto, sciben che tanti di seu colleghi l'aveivan suggerio de ciammâli "raggi Röntgen" (O mæximo Röntgen o s'é oppòsto à questa denominaçion). In quarche naçion, quest'urtimo nomme o l'é deuviou ancon. O Röntgen o l'à guägnou, into 1901, o primmo Premio Nobel pe-a fixica graçie à questa scoverta. Çerti colleghi, tra i quæ o Lenard, i no l'an conosciuo questo riconoscimento, scicomme i l'an deciarou de avei scoverto primma do Röntgen i raggi X.
L'ea pöchi giorni passæ da-a consegna do rappòrto preliminâ scrito da-o Röntgen che a notiçia da scoverta a l'aveiva za fæto o gio do mondo e a-i 5 de zennâ do 1896 l'ea comparso i primmi articoli in sciâ stampa (a "Press" de Vienna) e dexe giorni ciù avanti se n'ae interessou fiña o New York Times. O ton di articoli o no gh'ea gustou a-o Röntgen, ch'o l'aveiva fæto caxo segge à un ton sensaçionalistico stramesuou segge à unn'attençion carcâ e pontâ a-o reguardo de fotografie, contra de quello che segondo o sciensiou o l'ea da ëse o veo obbiettivo de reçerche, saieiva à dî a natua e e qualitæ di raggi.
Pe de ciù quarche seu eminente collega, comme pe fâ un exempio o Lord Kelvin, l'ea scettico e non l'é mancou ascì numeroxi cartoin umoristichi ch'i mostravan un erto grado de mäinteisa in sciô senso da scoverta, e in sciâ fin un bello gruppo de ciarlaten, comme una dita londineise ch'a l'aveiva fæto de reclam da missa in vendia de unna "giancaia a-a preuva de raggi X"; ò di religioxi franseixi ch'i l'aveivan fæto seu o fenòmeno, fin à sostegnî adreitua de poei fotografâ l'anima.
I Raggi X e i raggi gamma, comme e radiaçioin ionizzante ciù in generâ, l'en clascificæ da-i anni settanta segondo o IARC comme agenti cancerògeni conosciui, into deuvio radiològico e tomografico, e a-o mæximo tempo un di metodi de investigaçion çiù boin. Primma de sottopoñise a exammi contra produtivi, convëgne che un esperto o çernegge o rappòrto di reiseghi-benefiçi, pe fâ in mòddo che l'eccesso diagnostico o no se transforme inte unna causa contribuente da marottia.
I studi di epidemiòloghi, a Alice Stewart e o George Kneale i l'an documentou tra o 1953 e o 1956 o reisego de mäformaçioin e de cancao inti figgeu da nascion, se questi ò e dònne gravie vëgnan sottopòsti a-i raggi X.
Contròllo de outoritæ | LCCN (EN) sh85148749 · GND (DE) 4129728-3 · BNF (FR) cb119510960 (data) · NDL (EN, JA) 00561905 |
---|