La Val Strona (Valle Strona in Italian) l'è ona vall italiana, che la se troeuva in de la Provincia de Verbania, minga lontan del Lagh d'Orta.
L'è traversada del riaa Strona e l'è situada in mezz tra l'Ossola (a nord) e la Valsesia (a sud). Per rivàggh dent a la vall besogna partì de Omegna, che l'è in sul lagh.
In de la vall a troeuvom i comun de Germagn, Loreja, Strona e Masciola. El centro principal a l'è quell de Strona. Alter paes de la vall a hinn Luzzogn (parnoziaa [ly'tsøɲ]), Inugg, Forn, Fornee ([fu'rnɛːr]), Ches, Campell e Sambughett [samby'gøt].
L'attività tradizional de la vall a hinn i lavorà cont el legn, tant che on quai desenni fa la vall l'era cognossuda cont el nomm de vall di cazzui (che sarissen i cazzuu), ch'eren voeuna di robb pussee prodott. Al dì d'incoeu i artesan, ciamaa grattagamol, se dedichen soratutt a la produzion de statuinn de Pinocchio, tant che la Val Strona ogni tant la vegn ciamada anca Val de Pinocchio.
A Campell (Campello Monti), incoeu frazion de Strona, on temp a gh'era ona comunità walser de Premia: el paes el se ciamava Kàmpelj.