Slowakia atau sacaro rasmi Republik Slowakia adolah sabuah nagara nan takuruang daratan di Eropa Tangah, jo daerah pagunuangan di utara dan dataran di selatan.[1] Nagara ko babatehan jo Polandia di utara, Ukraina di timur, Hungaria di selatan, Austria di barat jo Republik Ceko di barat laut. Hutan manutuik i 41% permukaan tanah Slowakia.[2] Ibu kota jo kota tagadangnyo iolah Bratislava.
Politik Slowakia balansuang dalam karangko republik demokrasi perwakilan parlementer, jo sistem multi partai. Presiden adolah kapalo nagara jo kapalo eksekutif formal, walaupun kuasonyo sangaik tabateh.[3] Sadangkan kapalo pamarentahan dipacik dek Pardana Mantari.[4] Satu-satunyo badan legislatif iolah Dewan Nasional unikameral nan baanggotakan 150 urang nan dipiliah untuak maso 4 tahun badasarkan perwakian proporsional.[5] Economist Intelligence Unit manilai Slowakia “demokrasi nan cacat” pado tahun 2022.[6]
Panduduaknyo labiah dari 5,4 juta jiwa jo kapadekan panduduaknyo rato-rato iolah 110 jiwa per km2.[7] Manuruik sensus tahun 2021, mayoritas panduduaknyo adolah urang Slowakia (83,82%), jo minoritas Hungaria (7,75%), Roma (1,23%),[8] Ceko (0,53%), Rusyns (0,44%) jo nan lainnyo nan indak basabuikan (6,1%).[9] Ditahun nan samo, 55,8% panduduaknyo maidentifikasi diri sabagai panganuik Katolik Roma, 5,3% sabagai Lutheran, 1,6% sabagai Calvinis, 4% sabagai Katolik Yunani, 0,9% sabagai Ortodoks, 23,8% sabagai ateis atau non-religius, jo 6,5% indak manjawek.[10]