Domenico Modugno (Polignano a Mare, 9 'e jennaro 1928 - Lampedusa, 6 'e aùsto 1994), è stato nu cantautore vincitore 'e 2 Grammy Award, cumpositore e attore 'taliano. È cunziderato lo pate d’’e cantautore taliane e comm'autore nterprete è fra 'e cchiù grande d'Europa.
Nascette 'o 9 'e jennaro 1928, 'e orìggene mudieste, a Polignano a Mare 'n pruvincia 'e Bari, nu paisiello 'e case janche vicino ô mare. Dô pate Cosimo cumannante dô Cuorpo dî Guardie Municipale a San Pietro Vernotico (BR), se mparò già da piccerillo a suonare 'a chitarra e 'a fisarmonica e erredetò na grande passione pâ mùseca, cumponenno 'a só primma canzone a 15 anne.
Ammareggiato d’’a vita 'e paese, a 19 anni scappò 'e casa e si ne jì a Turino, addó s'adattò a fà 'o gommista dint’’a na fàbbreca. Returnato ô paese pe ffà 'o servizzio melitare, repartì pe Romma addó p'enizià 'a cariera artistica suja se mise a facere ancora na vota 'i cchiù ùmile mestiere. Partecepò dint'ô 1951 ô cuncurzo p'attore ô Cientro Sperimentale de Cinematugrafìa, a ddó fùe ammiesso e a ddó, successivamente, vinze 'a borza 'e studio comm'o mijore scolaro dâ sezzione de recetazzione. 'N chillu tiempo già avette parte 'n film comme p'esempio prise parte nâ verzione cinematugrafica 'e Filumena Marturano 'e Eduardo De Filippo.
Dopp'a ll'apparizzione televesiva 'n Il Mantello Rosso dint'ô 1955, enìzia 'a cariera 'e cantante. Modugno addeventò uno d’’e prutaguniste d’’a mùseca leggera 'nternazzionale quanno, cu' Nel blu dipinto di blu (cchiù nota comme Volare) triunfette ô Festival di Sanremo d’’o 1958 'nsieme a Johnny Dorelli. 'A canzone arrevò terza a ll'Eurofestival e vincette dint'ô 1958 doje Grammy Award (fùje pe tant'anne l'ùneco a vince' nu tale premmio pe na canzone taliana), uno comme disco 'e ll'anno e uno comme canzone 'e ll'anno 1958. Pure 'o Cash Box Bilboard ce diette ll'Oscar p’’a mijore canzone 'e ll'anno e recevette 'n dono dî 'ndùstie musecale tre dische d'oro, uno pe 'o mijore cantante, uno pe 'a mijore canzone e uno pe 'o disco cchiù vennuto.
Modugno hà partecepato a 11 Festival di Sanremo vincenno quatto vote (record ca tiene ansieme a Claudio Villa): dint'ô 1958 cu' Nel blu dipinto di blu, dint'ô 1959 cu' Piove sempe 'n coppia cu' Johnny Dorelli, dint'ô 1962 'n coppia cu' Claudio Villa cu' Addio... addio... e dint'ô 1966 cu' Dio, come ti amo ansieme a Gigliola Cinquetti. Dint'ô 1960 s'è classefecato secunno ansieme a Teddy Reno cu' Libero.
Hà partecepato a tre edizzione 'e ll'Eurofestival (1958, 1959 e 1966) classifecannose, ch’’e stesse canzone puortate a Sanremo, respettivamente terzo, sesto e diciassettésemo (ùrdemo). Dint'ô 1964 vincette 'o Festival 'e Napule cu' Ornella Vanoni ch’’a canzone Tu si' na cosa grande.
Attore tiatrale e cinematugrafico, recetò dint' â cummedia musecale Rinaldo in campo (1961), 'e Garinei e Giovannini, e 'n Liolà, prisa d’’a célebbre ópera 'e Luigi Pirandello. P’’o cinema realezzò comme autore-attore 'o film autobiografico Tutto è musica (1963), mente d’’o 1973 ô 1976 fùe Mackie Messer l'Opera da tre soldi 'e Weill-Brecht, deretta da Giorgio Strehler. Dint'ô 1974 vincette 'o Premmio Tenco, ch'è 'a primma rassegna d’’a canzone d'autore 'e Sanremo.
Artista notissimo e d’’a grande presenza scéneca, ce fùje attrebuìto pure 'o nomme 'e Mister Volare, referennose â suja canzone. Fra l'ate canzone s'allecuordano Piove, Vecchio frack, Resta cu' mme, Dio, come ti amo e Lu pisci spada ('n lengua siciliana). 'N realtà 'a suja capacetà 'e cantà 'n siciliano ce deriva da l'avére vissuto dint’’a l'anne d’’a giuvenezza a San Pietro Vernotico, comune d’’a pruvincia 'e Brinnese, addó, comme 'n tutto 'o Salento, 'o dialetto è assaje sìmmele ô siciliano.
Domenico Modugno fùje curpito da n'ictus dint'ô 1984 dint’’e prove d’’a trasmissione 'e Canale 5 La Luna del Pozzo e fùje custrietto a lassà ll'attività artisteca. Se dedecò â pulìtica e venne eliétto parlamentare dint’’e liste d’’o Partito Radicale d’’o 1987 ô 1992.
Murì dint’’a casa soja 'e Lampedusa dint'ô 1994, struncato 'e nu 'mpruvviso e, 'sta vota, fatale novo ictus.