De Punt of (De) Punthörst (Nederlaands: Punthorst) is een buurtschop in de Aoveriesselse gemiente Stappest. 't Is een nog aordig jonge woonkern, onstaon in de jaoren dartig van de 20ste ieuw toen ok ten noorden dervan 't Stappester bos anelegd is. Op 1 jannewaori 2021 woonden der 970 mèensen.
As veldname wördt Punthorst en 't daorbij heurende laand, de Puntlaanden, temiensen al in 1825 vermeld. As plaatsname veur de sinds de jaoren dartig ontstaone lintbebouwing oostelk van de Leidiek verschient de name rond 1960 op kaorten.[1][2]
De belangriekste deurgaankswegen bint de Mr. J.B. Kanlane en de Schaopendiek, die nao de krusing mit de Mr. J.B. Kanlane de Vieverweg het. Dizze leste weg löp deur 't Stappester bos en bij camping De Dassenburcht en zwömplasse De Zwarte Dennen langes. De Ingenieur J. Nijsinghstraote bij de krusing is de bebouwde kern van De Punt. An de Mr. J.B. Kanlane stiet een Schoele mit de Biebel, de Dr. Maarten Lutherschoele. De plaatse die 't dichtst in de buurte van De Punt lig, is Neilusen in 't zuudoosten.
In 't butengebied, an de Dekkersweg, staot twee kruzen in de barm ter naogedachtenis an de Fraanse parachutist Yves Loichot en de Nederlaandse verzetsstrieder Jacobus Cornelis (Kees) de Roos. Zij wördden op 8 april 1945 op die plekke gedood in een gewaopend treffen mit een NSB-gezin det ze wolden inreken. Dezölfde dag hebt Fraanse militairen en plaatselijke verzetsmèensen as represallie vief leden van dit gezin en nog drei aandere mèensen uut NSB-femilies terechtesteld.[3]
Op 7 september 1944 scheut 't verzet de hoge SS'er Nicolaas van der Schatte Olivier dood op de J.B. Kanlane. As represallie daorveur voerden de Duutsers twintig Stappesters of naor concentraotiekamp Neuengamme, waor ze allemaole ummekomen bint.[4]
![]() |
Dit artikel is eschreven in 't Zuudwest-Drèents. |