Harm Tiesing (Börger, 13 meert 1853 – Börger, 22 oktober 1936) was een Drèentstalige schriever.
Tiesing gruiden op in aarmoe en warkten van jongsofan op de boerderi'je. Daorumme kun e niet op 'e schoele; hi'j ontwikkelden hum deur zölfstudie. As jongkerel was e eerst dagloner, daornao keuterboer. Hi'j had een bulte karkelijke en sociaole functies: jaken, gemienteraodslid, ambtenaor bi'j de börgerlijke staand en sikketaoris van 't waterschop en de Gezondheidscommissie.
Tiesing begunden te schrieven uut geldgebrek. Oaver laandbouw- en volkskundige underwarpen schreef e meer as duzend stokken in kraanten, tiedschriften en almenakken. Hi'j schreef ok Drèentse tenielstokken en inkele gedichten, mar veural bekend bint zien dörpsnovelles in fulletonvörm. Drei daorvan, zowat hielemaole Drèentstalig, kwamen nao zien dood in boekvörm uut (kiekt bi'j Fulletons).
In 1943 verscheen van C.H. Edelman de verzamelbundel De geschriften van Harm Tiesing over den landbouw en het volksleven van oostelijk Drenthe (Assen: Van Gorcum & Comp.).
De historische veriening in Börger is naor Harm Tiesing vernuumd.
In 1986 wördden de Stichting Harm Tiesing op-ericht, mit as doel de kennis van de geschiedenis van de veurmaolige gemiente Börger uut te breiden. Op de eerste zaoterdag van november organiseert dizze Stichting de jaorlijkse Harm Tiesingdag.
Tiesing wördt niet herinnerd as schöpper van grootse literetuur. 't Oaverzichtswark Drèentse schrieverij (kiekt bi'j de Bronnen) nuumt hum 'As schriever mislukt' , mar voegt daoran toe:
Dizze schrieveri'je van mangs beparkte literaire kracht, mar vol beschrievings van 't volksleven en vol mandielige gevulens, vi-j ok in de twintigste ieuw bi'j een köppel Nedersaksische dichters en romanschrievers. Zi'j hebt 't veurbereidend wark edaon veur de meer experimentele, persoonlijke en ni'jmoodse Nedersaksische schrieveri'je vanof de twiede helfte van de twintigste ieuw.
Bronnen / wellen: |
|