Wetering is een dörp in de gemiente Steenwiekerlaand in de perveensie Overiessel. In 2008 woonden d'r 200 meensen.[1]
Wetering is een kenaal- of vaardörp. De naeme komp van een old ofwaeteringskenaal in et vroggere Scheerwolde dat rond 1564 de Scherwoldiger Weteringe nuumd wodden. Midden 16e eeuw is de Arembergergrachte graven, een veilige binnenvaortroute as alternatief veur de vaort over de Zuderzee. Vanof et Gieterense Meer wodden de vaarweg in noordelike richting deuretrokken deur de Riete (Moggebiet) naor de Wetering.
In 1573 wodden de Wetering brieder en dieper emeuken. Et was de bedoeling omme langes de Oldeslootweg (tingwoordig de Kaelenbargergrachte) deur te graven naor Ossenziel en de Lende. In 1650 is dit alles erealiseerd. Van 1626-1632, de anleg van et Steenwiekerdiep, is de Wetering töt an Moggebiet verbried.
Wetering lig in de Weerribben, onderdiel van Nationaol Park De Weerribben-Wieden. Et lig zo'n vier kilometer oostelik van Blokziel en zo'n tien kilometer westelik van Steenwiek.
Et dörp hef lintbebouwing, dat wil zeggen: vri'jwal anienesleuten bebouwing langs de oorspronkelike (waeter)heufdwegen.
Kenmarkend an Wetering is et kenaal mit an weerskaanten woningen. De westelike kaante kuj berieken vanof Blokziel, Steenwiek en de buurtschop Nederlaand. Dizze weg gaot over in een fietspad richting Kaelenbarg en Ossenziel. An de oostkaante lig de weg mit verbiending naor Scheerwolde, Kaelenbarg, Ossenziel en Oldemaark. Et kenaal is een staonde mastroute vanof Gieteren, Blokziel en Steenwiek naor de Friese meren.
Et ontginningslaandschop van hoog- en leegtrilvene en kraggen is ontstaon uut de törfwinning en de daorop volgende rietkultuur. Et laandschop wodt ekenmarkt deur et veule waeter, uutestrekte rietlaanden of-ewisseld mit natte bospercelen en drassige gröslaanden.
Via et waeter bin waeterdörpen ontsleuten zoas Wetering, Moggebiet, Kaelenbarg, Ossenziel, Gieteren, Dwarsgrachte, Jonen en Belt-Schutsloot. De boerderi'jen in de bebouwingslinten staon vaeke mit de veurkaante naor et waeter. In et gebied domineren de rieten daoken en zwatte holten wanden.
![]() |
Dit stok is eschreven in et Stellingwarfs van Stienwiekerlaand. |