Ch't' articl'ye fut c'menchie en Jèrriais
|
Jean Sullivan (John Sullivan, J.S., Oméga), 1813-3 d'Août 1899, 'tait l'seul auteu qu'nou connaît tchi dit qu'il êcrivait dans lé dgialecte Jèrriais dé Saint Hélyi, à ch't heu dispathu. Pouortant sa manniéthe d'êcrithe 'tait si idgiosŷncratique qu'nou n'peut pon aîsiment chein tch'est p't-être typique du dgialecte, d'auve chein tchi n'tait qu'des teurs à li.
Fis du directeu d'l'Hôpita, i' s'întérêssait dans l'histouaithe et la littéthatuthe. I' 'tait notaithe, journaliste (rédacteu du Jersey Observer), artiste, et auteu d'livres en Angliais et en Français (auve ofûche tchiquefais pus d'fantaisie qué d'histouaithe), et d'poésies en Jèrriais, en Angliais et en Français, l'pus souvent d'eune manniéthe extravagante.
Tout coumme, i' vaîsinnait auve les auteurs v'nus en Jèrri. Victor Hugo li'êcrivit: "vous êtes, Monsieur, dans cette précieuse langue locale, un vrai Poëte". I' connaîssait Alfred, Lord Tennyson tchi v'nait vîsiter san fréthe à d'Hautrée, et fit eune vèrsion Française dé Crossing the Bar. I' travaillit auve Messire John Everett Millais tchi fit un portrait (înmaginnaithe) dé Wace pouor un livre dé Sullivan.
I' 'tait un monarchiste dêvoué, et cratchait d'êt' "patronné par Sa Majesté la Reine". Hardi d'ses poésies fête des vîsites et annivèrsaithes rouoyaux.