Jndr'â sciugrafije, 'u deserte jè definite cumme 'na vanne d'a superficie terrestre quase o combletamènde no javetate, jndre cui le precipitazaione difficilmènde superane le 250 millimetre l'anne e 'u terrene jè p'a granna vanne aride, cu picca vegetazione[1].
'Mbrà lle deserte, 'mbase a quèste definizione, s'honne a cundà pure le Reggione polare, oltre a le cchiù familiare vanne aride ca se iacchijene a le medie e vasce latitudene.
'U terrene suve combrenne mundagne, ìrtechiane o pianure ruvide e aspre, occupanne quacche vôte bacine circunnate da mundagne. 'A superficie pòte jèssere de tipe rocciose, ghiajose o renôse: le paìsagge caratteristeche cu le dune e c'a Réne menàte da 'u vìende sonde sule une de le tande fazze co' cui se pòte presendà 'nu deserte.
Quacche vôte 'a parole deserte avène ausate pe' innecà 'nu luèche no javetate da essere aumane e picche javetate da otre specie vivende: pure 'mbase a quèste definizione, le deserte combrennene le luèche da 'u clime rigide, cumme l'Artide e 'a tundre o cchiù 'ngenerale le Reggione polare.
'A parole deserte non g'ète sule 'nu sostandive me pure 'nu aggettive c'u segnefecate de "sule, abbandunate". 'U latine desertum avène da 'u verbe deserere ca segnefeche abbandunare. Deserere, a sove vôte, jè comboste da de, cu valore negative, e serere (legare) accussì non cchiù legate.
('Ngorsive le deserte polare)
Nome | Grannèzze (km²) | Addò se iacchije |
Antartide | 14.500.000 | Antartide |
Sahara | 7.800.000 | Afriche settendrionale |
Groenlandie | 2.166.086 | Americhe settendrionale-Europe |
Libiche-Nubiane | 1.770.000 | Libie-Egitte-Sudan |
Gran Deserte Australiane | 1.520.000 | Australie |
Gobi | 1.500.000 | Cine-Mongolie |
Kalahari | 750.000 | Namibie-Botswana-Sudafriche-Zimbabwe |
Rub' al-Khali | 700.000 | Arabie Saudite |
Deserte patagoneche | 670.000 | Argendine |
Deserte de Simpson o de Arunta | 584.000 | Australie |
Gran Deserte Renôse | 400.000 | Australie |
Taklamakan | 400.000 | Cine |
Deserte siriane | 330.000 | Sirie |
Gran Deserte Victoria | 320.000 | Australie |
Deserte de Sonora | 311.000 | USA- Messeche |
Arabeche | 300.000 | Egitte |
Karakum | 300.000 | Turkmenistan |
Kizilkum | 300.000 | Uzbekistan-Kazakistan |
Deserte de Thar o Gran Deserte | 260.000 | Indie-Pakistan |
Deserte de Gibson | 220.000 | Australie |
Deserte de Sechura | 185.000 | Perù |
Atacama | 132.000 | Cile |
Deserte d'u Nafūd | 72.000 | Arabie Saudite |
Deserte d'u Namib | 50.000 | Namibie-Angola |
Deserte d'u Mojave | 38.000 | USA |
Deserte d'u Negev | 17.300 | Israele |
Deserte Dipinde | 19.400 | USA |
Los Médanos de Coro | 91 | Venezuela |