Robert College (turqisht: Robert Koleji ose Amerikan Koleji) në Stamboll është një institucion privat dhe i pavarur i arsimit të lartë, institucion koedukativ i cili ndodhet në pjesën evropiane të Stambollit, në Arnavutkoj. Ka një histori të gjatë të veprimtarisë edukative e arsimore. Nga ky institucion dolën kuadro të shquara dhe me emër si politikanë, gazetarë, artistë, etj. mes tyre, dy kryeministra turq, katër kryeministra bullgarë, tre anëtar kabineti të Qeverisë Turke dhe një nobelist. Po nga ky institucion dolën edhe një numër i konsiderueshëm i kuadrove shqiptare mes të cilëve duhet përmendur pedagogen e shquar shqiptare Parashqevi Qiriazi.
Kolegji amerikan i Robertit (Robert College) u themelua në vitin 1863 në Seminarin e Shkollës Bebek të Stambollit, nga ana e filantropistit amerikan Christopher Robert dhe misionarit Cyrus Hamlin. Në kuadër të R.K. funksiononte edhe Kolegji Amerikan i Vajzave (American College for Girls). Qëllimi i themelimit të këtij institucioni fillimisht ishte arsimimi dhe edukimi i minoriteteve të krishtera të Perandorisë Osmane, mirëpo me kalimin e kohës R.K. u bë një institucion i theksuar sekular i arsimit të lartë i njohur jo vetëm brenda por edhe jashtë Republikës së Turqisë. Në këtë institucion studiuan mijëra studentë nga 14 kombësi të ndryshme. Mes tyre numërohen rreth 70 studentë shqiptarë.[1]