Autonavigation moaket dät muugelk, altied tou bestimmen wier me is. Dät oarbaidet mäd dät GPS (Global Positioning System), wät Funksignoale fon spezielle Satellite benutset. Do seende immer gans seküür hiere Position un ju Tied fon ju Seendenge. Ju Navigationsreewe ämpfangt sun Signoal, sjucht ap ju Klokke wo loang dät Signoal unnerwains weesen is un kon dan mäd ju gans bekoande Funkgauegaid bereekenje, wo fier die Satellit wäch is.
Wan me nu in dät Auto mäd sun Reewe fiert, un me ämpfangt aan Satellit die der buppe Lier is un n uuren buppe Ait, dan weet me also, wo fier me fon Ait is un wo fier fon Lier un deermäd sunt do two muugelke Steeden fon dät Auto ap dät flache Lound gans genau bestimd.
Uum nu tou wieten, wäkke fon do two ju gjuchte Steede is, bruukt me also noch n trääden Satellit, t.B. buppe Twiskenoan. Deermäd kon dan tougliek uk ju Hööchte feroarbaided wäide, sodät me deermäd uk in do Bierge fiere kon. Eegentelk rakt dät bie tjo Satellite uk noch n twäiden Punkt, man die fint sik twäie so hooch as do Satelliten buppe ju Äiduurfläche un is deeruum in dän Autoferkier uunmuugelk. Deermäd houget me also nit tou reekenjen.
Deeruum dät ju Navigationsreewe gans genau ju Tied wiete mout, bruukt me deerfoar uk noch n fjooden Satellit. Wil me dan intwiske ju oaine Loage weet, kon me hieren Oustand uunouhängich bestimme un deermäd ju Tied fon Ämpfang, dät is daach Tied fon Seendenge plus Raiseduur fon dät Signoal. (Fonsälwen weet me dät eerste Moal ju Tied un ju oaine Loage dan nit genau, man truch automatiske Wierhoalenge kumt me aal tichter bie dän gjuchte Wäid).
Uum tou wiesen wier me sik mäd ju so bestimde Position befint, änthaalt ju Navigationsreewe elektroniske Koarten. Bie ne goude Marke kon me deer oafte näie foar deelleede, so dät aal do Annerengen in dät Weegesystem fluks mee apnuumen wäide.