Gebeurtenissn
- 1 januoari - In 't Verênigd Keunienkryk van de Nederlandn oender keunienk Willem I bepoalt e besluut dat ambtenoars van de provinsjes Ôost-en West-Vloandern, Antwerpn, Limburg en Brabant (met uutzoenderienge van Zuud-Brabant) overgeplatst goan wordn os ze gêen Nederlands kenn. 'n Ander besluut bepoalt dat allêne moa de persôonn die de 'landstoale' kenn in anmerkienge komn vor e job in d'administroasje. Doa komt miserie van want de Vlamsche bourgeoisie is Fransgezind en de clerus zit ermee in da mè 't Nederlands 't calvinisme invloed goa krygn ip de Vlamsche jeugd.
- april-meie - Keunienk Willem I bezoekt de zuudelyke provinsjes van de Nederlandn vo persôonlyk de stand van zoakn te lêern kenn. Hy begunt in Maastricht en reist ton via Limburg noa Luuk, woa dat hy surtout andacht èt vo de groeinde industriële bedryvigheid van de stad. Via Noamn en Dinant reist hy noa Bergn woadat hy de 2e meie toekomt. Hy bezoekt ook de nieuwe bedryvn in Henegouwn. De keunienk trekt ton ook noa steedn in Vloandern lyk Mêenn, Yper, Veurne en Nieuwpoort. Via Brugge en Gent reist hy deure nor Antwerpn woa dat hy d'hoave, die in vulle bloei is, inspecteert. Den 13ste meie komt hy toe in Brussel. Hy wordt overal goed oentvangn, beter of gepeisd. Zyn reize èt d' êenheid van 't land versterkt.
- 30 meie - Keunienk Willem I stoat e lênienge toe van 300.000 guldn an den Iengelschn industrieel John Cockerill.
