Marino
Marino binn'n de metropolitoane stad Rome
Regio	Lazio
Provinsje	Rome Ôofdstee (metropolitoane stad)
Coördinoatn	41°46′NB 12°40′OL
Ippervlak	24,19 km²
Inweuners Bevolkiengsdichtheid	44.671 (2018) 1846,67 inw./km²
Postcode	00047
Website	Officieeln site van Marino

Marino, somstekêe ôok Marino Laziale genoemd, es en Italioansche gemêente binn'n de metropolitoane stad Rome Ôofdstee in de regio Lazio. 't Ligt o de zuudôostkantn van Rome zelve, ip apeupri 21 kilomèiters van't center van Rome, in d'Alboanse Euvels. O de zuudôostkantn van Marino ligt et Meer van Albano.

Marino grenst an de gemêentn Castel Gandolfo, Ciampino, Grottaferrata, Rocca di Papa en an 't stad Rome zelve. De gemêente èit zes wykn en gehuchtn (frazioni): Castelluccia, Cava dei Selci, Due Santi, Fontana Sala, Frattocchie en Santa Maria delle Mole. Tout 1974 ôordigde Ciampino ôok by Marino, mo wierd erachter en aparte gemêente.

In tydde van den Klassiekn Oudeyd wierd 't groundgebied van d'uudige gemêente Marino beweund deur verschilligte Latynsche stamm'n. Ton loagn ier de stadjes Bovillae (woa nu Frattocchie ligt), Mugilla (woa nu Santa Maria delle Mole ligt) en Ferentum (Marino zelve) die olledrie leed'n woarn van de Latynsche Liga. Marino lag ôok nie verre van de Via Appia, de Romeynsche heirboane die liep van Rome noa't zuud'n van Itoalië tout in Brindisi.

• De bazilieke van d'n Illign Barnabas (Basilica collegiata di San Barnaba Apostolo), e barokkerke uut de zeevntiende êeuwe. Z'es gebouwd tusschn 1640 en 1655, mo mor ingeweyd in 1714.
• D'Illige Drievuldigeydskerke (Chiesa della Santissima Trinità), gebouwd in 1636, es ôok e barokkerke.
• De Santa Maria delle Grazie-kerke uut de vuuftiende êeuwe
• De kerke en 't klôoster van Illige Rooznkranse (Chiesa di Maria Santissima del Rosario) uut 1713 es gebouwd'n in d'n styl van de rococo.
• 't Palazzo Colonna uut de zestiende êeuwe.
• 't Palazzo Matteotti uut de neegntiende êeuwe in neoclassicistischn styl, wa nu 't staduus es.
• 't Mithraeum, e tempel van in tydde van Romein'n gebruukt vo de mysteriecultus van de god Mithras, woarin je e schôon fresco kunt ziene uut de twêede êeuwe n.C. woarip da Mithras e stiere dôoddoet.
• De Moorefonteyne (Fontana dei Mori) die krygsgevang'n Ottomoan'n van den Slag by Lepanto (1571) ofbêeldt. Die fonteyne stoat ier mè da in da joar Marcantonio Colonna, êen van d'anvoerders van den slag, en 260 soldoatn uut Marino achter d'ooverwinniege ier were verwelkomd wierd'n mè en triomftocht deur 't stadje, wa elk joar nog erdacht wordt mè 't druuvefestival (De Sagra dell'uva) ip'n d'n êestn zundag van oktober. Ip die fêeste strôomt er bist êen uure vo nietn wyn uut de fonteyne in de plekke van woater, wa nateurlyk hil wa volk trekt.
• En and'r festival es de Sagra della ciambella al mosto ip d'n twidd'n zundag van oktober. Ip die fêeste stoat e sôorte van lokoale riengvorminge cake centroal die en bitje trekt ip nen donut mo mè rozyn'n en druvvesop in verwerkt.

• 
  De bazilieke van d'n Illign Barnabas
• 
  't Palazzo Colonna
• 
  De Moorefonteyne

Ofbeeldiengn die ier by passn ku je vien in de categorie Marino van Wikimedia Commons.