De Speeglreie is e woatreloop en e stroate in 't êrte van Brugge. De reie lopt van 't Jan van Eykpling toe aan de Langereie. De glyknoamige stroate ligt ip de nôordelikkn oevre van de reie en lopt van 't Jan van Eyckpling toe an de Karmersbrugge. Ip de zuudelikkn oevre ligt de stroate Spinolareie. Oendr 't Jan van Eyckpling lopt het woatr deure lik de teegnwôordig oovrwêfde Kroane-reie. De Speeglreie makt dêel uut van de loop van d' ôorsproenklikke riviere de Reie.
De noame "Speeglreie" zoe kommn van e speghele, tgêene in de platsnoamkunde e lankwerpig woatre is. 't Is meuglik genoamd no 't uus "De Grote Speghele". De noame verwyst ook no d' anweezigeid van verschillnde speeglmoakers.
Ôorsproenklik was de Spiegelrei verziene van drie bruggn: de zogenoamde Niewjoarsbrugge of Sint-Jansbrugge, de Keuningsbrugge en de Karmersbrugge. D' êeste, die in 't verlangde van de Wynzakstroate lag, verdwêen echtre in 1787 deur d' oovrewêvienge van de Kroane-reie en den anleg van 't Jan van Eyckpling (tonne d' Akademieplatse).
D' omgeevienge van de Speeglreie was e belangryke middlêewsche kommêrsjêele wyk mêt oavnverzieniengn. Vanof 1134 was Brugge bereikboar lanst 't Oed Zwin, de Langereie en de Speeglreie. In 't begun woarn de kommêrsjêele aktievieteitn allêene mo lanst de Langereie. Roend 't ende van de 12ste êewe verlei 't zwoartepunt êm no d' asse Speeglreie-Kroane-reie, d' uutgeleezn plekke vo styf vroeg aa kommêrsantn-uuzn te bown, dichte by den oavn en 't Tol-uus.
Vanof de 16ste en 17ste êewn verminderdn de schêepvoart en d' oavnaktievieteitn rond de Speeglreie en Kroane-reie. Da kwam oendr mêer deur de verplatsienge van de kommêrsje nor Antwerpn, en ook deur 't groavn van d' Andelskomme en de Koepeure in Brugge zelve. Pertanks, nog toe 't begun van de 20ste êewe leidn reeglmoatig binnescheepn an ip de Speeglreie. De Keuniengsbrugge was toe tonne zeifs e droajbrugge.
![]() |
Ofbeeldiengn die ier by passn ku je vien in de categorie Spiegelrei (Brugge) van Wikimedia Commons. |