campidanesu · logudoresu · nugoresu
Giuseppe Corongiu | |
---|---|
Àteros nùmenes |
|
Nàschida | 1965 Làconi |
Natzionalidade | sarda |
Tzitadinàntzia | italiana |
Traballu | dirigente de s'amministratzione pùblica, giornalista, iscritore, istudiosu e ativista pro sa limba sarda |
Professione | dirigente de s'amministratzione pùblica |
Prèmios |
|
Giuseppe Corongiu (Làconi, 1965) est unu dirigente de s'amministratzione pùblica, giornalista, iscritore, istudiosu e ativista pro sa limba sarda.[1]
Nàschidu e pesadu in Làconi, s'est laureadu in Lìteras modernas in s'Universidade de Casteddu in su 1991. A pustis, at incumintzadu a traballare comente giornalista professionista, mescamente in sa sede de Casteddu de sa Nuova Sardegna.[2] Semper in su 1991, paris a Roberto Spano, at iscritu unu libru pro contare s'istòria de sa parte sarda de su movimentu universitàriu "Pantera".[3]
In su 1996 at incumintzadu a traballare a intro de s'amministratzione pùblica, in su comune de Cuartu Sant'Aleni[4], in ue est istadu consulente, funtzionàriu e dirigente, e a pustis de sa lege 582/99, est istadu su primu a iscrìere atos pùblicos bàlidos in sardu e in su 2001 fintzas su primu a fàghere su cuncursu pro devènnere dirigente in sardu.[2] In sos matessi annos est istadu promotore de su primu Ufìtziu de sa Limba Sarda in Sardigna, abertu in su 1999 semper in Cuartu[5], e semper in su 2001 at collaboradu cun sa pàgina in sardu de s'Unione Sarda.
Dae su 2001 a su 2006 at collaboradu a creare e at dirìgidu su Sòtziu Limba Sarda e sa rivista issoro Diariulimba.[2][6]
In su 2003 e in su 2004 at presentadu su programma “Andalas de imparu” in Tele Costa Smeralda, e a pustis at fatu àteras trasmissiones in TV e ràdiu. Pro una de custas fata pro Radiolina, "Vocabolàriu sardu", at retzidu in su 2007 su Prèmiu Funtana Elighe.[2]
In su 2005 at organizadu, in su Comune de Cuartu, cursos e masters de limba sarda dedicados a sos funtzionàrios de s'amministratzione pùblica e a sos tradutores.[5]
Dae su 2006 a su 2008 est istadu consulente linguìsticu de sa Regione Autònoma de sa Sardigna, est istadu unu de sos redatores de su situ Sardegna Cultura e nd'at coordinadu sa tradutzione in sardu. A pustis at collaboradu a sos traballos preliminares netzessàrios pro s'iscritura de su documentu definitivu de sa Limba Sarda Comuna, at at coordinadu sas fases finales de publicatzione de sa chirca sotziolinguìstica Le lingue dei Sardi, a incuru de Anna Oppo e presentada dae sa Regione in su mese de maju de su 2007, in Paulle.[2]
Semper in suportu de s'impreu de una norma ortogràfica ùnica pro su sardu[7][8], dae su 2006 at isseberadu de l'impreare pro iscrìere sàgios e pro mèdiu fintzas de cussos at chircadu de isvilupare unu limbàgiu adatu a un'impreu ufitziale, amministrativu e giurìdicu, mescamente pro su chi pertocat a s'amministratzione pùblica sarda.[9][10][11] Sos primos libros suos in ue at iscritu de custos argumentos sunt istados Guvernare cun sa limba e Pro una limba ufitziale, ambos publicados in su 2006. In su 2009 imbetzes at publicadu Una limba comuna cun milli limbàgios: su sardu in sas istitutziones, mèdios, tradutziones e iscièntzia.
De su 2008 a su 2014 est istadu su primu diretore de su Servìtziu Limba e Cultura Sarda, istituidu tando pro sa prima borta, e in custu perìodu at sighidu progetos medas[2] e curadu sa tradutzione e sa publicatzione de una collana de libros chi incluint sa chirca giai mentovadas ma fintzas su tratadu de Lisbona, s'istatutu sardu, sa costitutzione italiana, sas leges ligadas a sa normativa linguìstica leges, una grammàtica, unu ditzionàriu isperimentale, sas normas de sa LSC e àteru.[12]
In su 2013 at publicadu Il sardo: una lingua "normale", unu libru chi at tentu duas editziones e unu sutzessu mannu, siat pro su chi pertocat a sa visibilidade e siat pro sas bèndidas, ma chi, cuntenende denùntzias a personalidades de sa cultura e de sa polìtica sarda, acusadas de chircare de frenare s'isvilupu, sa valorizatzione e s'ufitzializatzione de sa limba sarda, at causadu fintzas polèmicas medas.[13][2][6]
In su 2014 fundat su CSU - Coordinamentu pro su Sardu Ufitziale, che dae su 2014 a su 2019 faghet atividades e batallas medas pro sa limba sarda, contra a sas polìticas regionales de sa giunta de cussos annos.[14][2] Semper in su 2014 incumintzat a dirìgere su gionale LImba Sarda 2.0, chi pùblicat artìculos de e in limba sarda e medas cosas ligadas a su movimentu linguìsticu.[2] Intre custas una proposta de lege pro sa valorizatzione sua, presentada in su Cussìgiu Regionale dae Sardegna Vera.[15]
In su 2016 faghet parte de sa delegatzione chi cunsignat sa tradutzione in sardu de su Don Chisciote, fata dae Gianni Muroni, a su museu dedicadu a sas òperas de Cervantez in Tolosa.[16]
In su 2017 at bortadu in sardu una sèrie de contos pro pitzinnos iscritos dae Antoni Gramsci, e publicados in su libru S'àrbore de s'eritzu de sas editziones Abbà. In su matessi annu est istadu fintzas rapresentante de sa minoria sarda in su Comitadu pro sa Costitutzione de sa Consulta Istatale de sas Minorias Linguìsticas in su Ministèriu de Sos Afares Regionales italianu, e su Ministèriu de sa Giustìtzia l'at incarrigadu de traduere in sardu totu su còdighe de s'ordinamentu penitentziàriu.[1]
In su 2019 at publicadu sa prima regorta de contos sua, Metropolitània e àteros contos tòpicos, distòpicos e utòpicos, in ue at esploradu temas medas, istesiende·si dae sa mirada antropològica traditzionale pro chircare de si ligare de prus a una literadura "cuntemporànea, tecnològica, venidora, a tintas e colores allutos"[17].
In su 2020 at torradu a publicare unu sàgiu in contu de limba sarda, A dies de oe - Annotos pro una limba sarda tzìvica e cuntemporànea.[18][19]
In su 2022 at publicadu su primu romanzu suo, S'intelligèntzia de Elias, unu giallu distòpicu in limba sarda, cun sa domo editora Janus[20][21][22][23], e s'8 de santugaine de su matessi annu at fatu parte de sa giuria de sa prima editzione de su Prèmiu Ondras pro sa Promotzione e Valorizatzione de sas Limbas Minoritàrias.[24][25][26][27]
Controllu de autoridade | VIAF (EN) 45959892 · ISNI (EN) 0000 0000 7102 7754 · BNF (FR) cb161343713 (data) · GND (DE) 1041792824 · LCCN (EN) n92069496 · OL OL851921A · SBN (IT) CAGV015734 · SUDOC (FR) 175663599 · WorldCat Identities (EN) n92-069496 |
---|