Lu Ptite Luwate
Li Ptite Louwate ou Li Ptite Louwete (la-minme Lu Ptite Luwate, F. Louette-Saint-Pierre ), c' est èn ancyin ptit ban del Walonreye rebané avou Djedene, el province di Nameur.
Li Ptite Louwate, c' est l' pus vî des deus viyaedjes frés, ki l' ôte, c' est l' Grande Louwate.
Dins l' Bwès Sint-Djan, sol voye di Lintchamp, onz a rtrové des pires drudikes, ki prouvrént k' i gn aveut des Celes avårla. On pô pus hôt, a Tchvådos, al plaece k' on lome " Fosse ås moirts ", gn avot des tombales do tipe tombes ås cindes di djins, do prumî sieke divant Dj.C.
Li voye ki va enute di Lintchamp al Pitite Louwate, c' esteut on boket del voye rominne Rinse-Tongue.
E l' Moyinådje, li viyaedje passe d' ene måjhon nôbe a l' ôte, a l' assorlon des arindjmints, des mariaedjes u des pårtixhaedjes.
E 1600, les Grands-Duks Albert et Isabelle avént on grand bwès da zels, co lomé enute «li Ban Nosse-Dame» (Notre-Dame); gn aveut èn ermitaedje djusse dizeu l' tchapele Sint-Djan. Endè dmeure co ene vôsseure.
Li vijhnaedje del France a amoenné bén des måleurs ezès XVIinme et XVIIinme siekes.
Li 23 d' awousse 1914, gn a yeu la ene plouzêye etur les Almands et l'erî-wåde francesse. Bilan : 9 civils touwés et 38 måjhons greyeyes.
C' est djondant l' ermitaedje kel famile Clarinval di Djedene a dmoré disk' al guere di 1940. Leu måjhon a stî distrûte après l' guere. Asteure, come bastimint, i n' dimeure pus kel tchapele, a ene pixheye del frontire francesse.