Quinne Brown, (gebore 9 Junie 1979, Johannesburg, Transvaal), is 'n Suid-Afrikaanse aktrise. Nadat sy gematrikuleer het, het sy in geografie en antropologie studeer aan die Universiteit van Johannesburg. Gedurende haar studies het sy die geleentheid gekry om deel te wees van die SABC2-sepie, 7de Laan. Brown het bekendheid verwerf vir haar rol as Connie van der Lecq in die sepie. Brown het ook as aanbieder gewerk op die SABC2-geselsprogram, Pasella.
Persoonlike lewe
In 2003 het Brown sabatsverlof geneem na haar pa se dood in April daardie jaar. Sy het na San Francisco vertrek, waar sy haar toekomstige man ontmoet het.
Brown is in 2006 met Ryan Hufman getroud en die egpaar het in San Francisco gewoon, waar sy ook aan teater, film en advertensies gewerk het. In 2008 het Brown begin om kinders te onderrig by 'n toneelskool vir kinders.
Die egpaar het hierna na San Diego verhuis waar hulle hul twee dogters, Charlotte en Lara, ryker geword het. Daar het Brown ook as 'n vroedvrou gekwalifiseer om vroue by te staan tydens hul bevallings. Na tien jaar in Amerika, het die gesin teruggekeer na Suid-Afrika en Quinne het in 2016 weer by 7de Laan aangesluit, steeds as die karakter Connie.
