Sälbstbordret, 1649-50, Paris, Louvre

Dr Nicolas Poussin [pu'sɛ̃] (* 15. Juni 1594 z Les Andelys (Normandi); † 19. Novämber 1665 z Rom) isch e franzöösische Mooler in dr Zit vom klassizistische Barock gsi.

Lääbe und Wärk

Dr Poussin isch zwüsche 1612 und 1621 z Rouen und Bariis zum Mooler usbildet worde. Dört het er dr Dichder Marino kenne gleert, wo sis Inträssi für die griechischi und römischi Müthologii gweckt het. Dr Poussin het für im Marino si Epos über d Venus und dr Adonis Zäichnige gmacht. 1624 isch er uf Rom und het d Bekanntschaft vo d Mooler Jacques Stella und Claude Lorrain gmacht, vom Cassiano dal Pozzo, eo im Kardinal Barberini si Sekretäär gsi isch, und vom dütsche Mooler und Schriftsteller Joachim Sandrart, wo spööter über en brichtet het. Er het d Wärk vom Tizian und vom Raffael gstudiert und au die antike Kunstwärk in dr Sammlig und em Archiv vom dal Pozzo. 1630 het er d Anne Marie Dughet ghürootet, d Dochder vom ene franzöösische Koch z Rom.

Dr Poussin het s as Mooler schweer gha Arbet z finde, wil dr Babst und die Aadlige etablierti Italiäner wie dr Guido Reni, dr Pietro da Cortona oder d Carracci vorzooge häi. 1627 het em dr Kardinal Barberini e wichdige öffentlige Uftraag vermiddlet für e groosses Altarbild mit em Martürium vom Häilige Erasmus für St. Peter. Das Bild het em aber nid zum Durchbruch verholfe. 1631 isch er in d Accademia di San Luca ufgnoo worde.

D Hirte vo Arkadie

Dr Poussin het sich denn uf Bilder in chliinere Format mit religiööse, müthologische und historische Theme konzentriert, und die brivate Sammler häi en afo schetze. 1638 het em dr dal Pozzo dr Ufdraag für e Serii vo Bilder über die siibe Sakramänt gee, won er vier Joor lang dra gschafft het. Für e dal Pozzo het er au Illustrazioone für im Leonardo si sogenannte Moolerei-Traktat gmacht.

1641 isch dr Poussin zimlig widerwillig zrugg uf Bariis, wil s dr franzöösisch Köönig Ludwig XIII. het welle und dr Richelieu groosse Druck uf en usgüebt het. Dr Köönig het en zum Diräkter für d Usstattig vo de köönigliche Baute ernennt und het em dr Ufdraag gee d Grande Salle im Louvre aazmoole und Entwürf für d Deppigwääberei z mache. Für e Kardinal het er s allegorische Bild D Zit entzieht d Woorhäit de Aagriff vom Niid gmoolt. Dr Poussin isch mit de etablierte Bariiser Künstler nid guet z Schlaag cho und au sini Ufgoobe am köönigliche Hoof häi em nid seer gfalle. Scho im Herbst 1642 isch er vo Bariis furt und isch für immer uf Rom zrugg. Wo am 4. Dezämber 1642 dr Richelieu gstorbe isch und im Joor druf dr Köönig, het dr Poussin z Rom chönne bliibe und schaffe wie s em gfalle het.

Z Rom het er wider chliini Bilder gmoolt mit religiööse und müthologische Themene, und het mee und mee Landschaftsbilder afo mache, wo müthologisch ufglaade gsi si. Sini Chunde si zerst e chliine Kräis vo gebildete römische Kunstliebhaaber gsi, wo sich mit em Studium vo dr Antike beschäftigt häi. Drunder si dr Giulio Rospigliosi, dr spööter Babst Clemens IX., gsi, dr Kanzler vom Babst Gian Maria Roscioli, und die franzöösische Botschafter am Vatikan, dr Duc de Créqui und dr Henri Valencay. Dr dal Pozzo het em in de spoote drissiger Joor au Kunde z Bariis vermiddlet, wo dr Bankiee Jean Pointel si Mezen worden isch und mee as 20 Bilder vom Poussin kauft het. 1639 und 1640 het er für sini Mezen Mäzene dal Pozzo und Pointel zwäi Sälbstbordret gmoolt. Zwischen 1643 und 1648 het er ere zwäite Serii über die siibe Sakramänt für e Chanteloup gschafft.
Wo dr Urban 1644 gstorbe isch, sini Nepote uf Frankriich gflüchdet si, und dr Dal Pozzo si Stellig und drmit au si Iifluss verloore het, het dr Poussin fast nume no für sini riiche franzöösische Ufdraaggääber, wie dr Pointel, dr Cérisier und dr Reynon gschafft.

Dr Summer, (Die vier Jooreszite)

Dr Höhepunkt vo sine letschte Joor isch d Folg vo de Vier Jooreszite gsi, wo mit iirer vildütige und vilschichtige Ikonografii d Fantasii vo de Interprete immer wider uusegforderet het.

1665 het en dr Lous XIV. as dr Erst Mooler vo Frankriich bestäätigt.

Dr Poussin isch am 19. Novämber 1665 gstorbe und in dr Chille San Lorenzo in Lucina begraabe worde.

Wärk (Uswaal)

DR Dood vom Germanicus, um 1626, Minneapolis
Dr Raub vo de Sabinerinne
D Rebekka am Brunne, 1648, Detäi
Buess zerstört
Daufi sit 1946 in dr National Gallery of Art, Washington
Ordination sit 2011 im Kimbell Art Museum, Fort Worth[1]
Eucharistie, Ehe und Letzte Ölung Äigedum vo de Trustees of Belvoir Castle

Liddratuur

Kwelle

Sekundäärliddratuur

Weblingg

 Commons: Nicolas Poussin – Sammlig vo Multimediadateie

Fuessnoote

  1. ↑ A Christie’s Loss Is the Kimbell’s Gain, Ardikel in dr New York Times vom 9. September 2011, abgrüeft am 9. Septämber 2011
Dä Artikel basiert uff ere fräie Übersetzig vu dere Version vum Artikel „Nicolas_Poussin“ vu de dütsche Wikipedia. E Liste vu de Autore un Versione isch do z finde.
Kategorie