De Phintas (altgriech. Φίντας) isch noch de messenische Saag de Soo vom messenische König Sybotas usem Gschlecht vo de Aipytide. Möglicherwiis isch er de erst historischi König vo Messenie. Er isch e Zittgnoss vom spartanische König Teleklos (853-814 v. Chr.) gsii.
Wo de Phintas öber Messenie gherrscht het, isches zu Spanige mit Sparta choo, well de König Teleklos im Grenzpiet zo Messenie d Städt Poiaessa, Echeiai und Tragion bisidlet hett, wie de Strabon gschribe hett.
814 v. Chr. isch de König Teleklos im Hailigtum Artemis Limnatis vo Messenier töödt wore. Da Hailigtum isch a de Grenze zwöschet Sparta und Messenie glege und am Kult hend d Messenier und d Spartaner tailgnoo. Wegem Tood vom Teleklos, so hend d Spartaner gsait, as d Messenier sich a d Priesterine vo de Artemis anegmacht hebi um si z schände und de Teleklos sai umchoo, woner die vertaidigt hett. D Messenier degege hend gsait, as de Teleklos Jüngling wo no kann Bart ghaa hend i Frauachlaider gsteggt heb und a dene Dölch gee hebi, demit die d Messenier ermordid. Wo sich de Messenier gwerrt hend sai au de Teleklos umchoo.
Nochem Pausanias hebid d Messenier underm Phintas zerstmool Opfer und e Manechoor zom Apollon uf d Insle Delos gschiggt.
Wo de Phintas gstorben isch, sind dem sini Söö, de Antiochos und de Androkles König vo Messenie wore.
D Historizität vo de literarisch uusgschmückte Ereignis werd vo de Forschig kritisch biwertet und d Jooresaagoobe bim Pausanias wered as faltsch aglueget, und söttet öppe 40 Joor spööter agesetzt were.[1]