Dr Vergil (* 15. Oktober 70 v. d. Z. z Andes bi Mantua; † 21. Septämber 19 v. d. Z. z Brindisi), äigentlig Publius Vergilius Maro (noch ere spootantike Schriibwiis au Publius Virgilius Maro oder Virgil), isch näben em Horaz dr bedütendsti römischi Dichder vo dr „Zit vom Augustus“. Si Aeneis gältet as s Nazionalepos vo de Römer.
Vili Daate us em Vergil sinere Biographii si unsicher und basiere uf spootantike und früemiddelalterlige Legände. En Abriss vom Lääbe und Wärk git s Grabepigramm, wo vom Sueton überliiferet isch:
(Übersetzig uf Dütsch: Mantua brachte mich hervor, Kalabrien raffte mich hinweg, nun birgt mich / Neapel. Ich besang Weiden, Fluren, Anführer.)
Dr Vergil isch as Soon vom ene Döpfer z Andes bi Mantua in Norditalie uf d Wält cho. Im Joor 53 v. d. Z. isch er uf Rom und het dört Rhetorik, Medizin und Astronomii studiert, het sich aber bald für Filosofii afo intressiere und isch e Zit lang bi de Epikureer um e Siron in dr Nööchi vo Neapel gsi.
D Ekloge oder Bucolica si e Sammlig vo zää Hirtegedicht, wo dr Vergil zwüschen öbbe 43 und 39 v. d. Z. verfasst het[1]. Vo 37 bis 29 het er an de Georgica („Über den Landbau“) gschafft, wo im Maecenas gwidmet si. D Aeneis häig er gschriibe, wil dr Octavian, wo dr Antonius in dr Schlacht bi Actium im Joor 31 gschlaage hatte und vier Joor spööter vom römische Senat dr Ditel „Augustus“ überchoo het, von em en Epos häig welle, wo si Heerschaft wurd rüeme.
Dr Vergil isch z Brundisium gstorbe, won er vo Griecheland zruggchoo isch, und het si Aeneis nie fertig gschriibe. Er het welle, ass mä s Manuskript noch sim Dood wurd vernichde, dr Augustus het aber befoole, ass mä s wurd veröffentlige.
Im Middelalter het dr Vergil as der Dichder gulte und as Vorbote vom Christedum. Im Dante sinere seiner Göttlige Komödie isch dr Vergil dr Füerer gsi.
Bis hüte gältet dr Vergil as äine vo de grösste Schriftsteller in dr römische Antike.
Publius Vergilius Maro im dütschsprochige Wikisource
Vergil im dütschsprochige Wikisource
Dä Artikel basiert uff ere fräie Übersetzig vum Artikel „Vergil“ vu de dütsche Wikipedia. E Liste vu de Autore un Versione isch do z finde. |