Zupfinstrumänt si Säiteinstrumänt (Chordofoon), wo mä mäistens mit de Fingerschbitze oder eme Plektrum d Säite aarisst oder aaschloot und so in Schwingig versetzt. Es git Zupfinstrumänt, wo mä d Säite mit em Finger verchürzt und eso d Hööchi vom Doon veränderet. Je noch dr Art vom Instrumänt macht mä daas mit oder ooni e Griffbrätt. Bi andere Instrumänt verchürzt mä d Säite nid, sondern es het für jeede Doon mindestens äi Säite. Die ersti Grubbe vo Zupfinstrumänt si d Lauteinstrumänt, zu dr zwäite ghööre d Ziddere, d Harfene und Leiere.

• Bi de Lauteinstrumänt, wo d Gitaare drzue ghööre, si d Säite paralleel zur Resonanzdecki und d Schwingige wärde über e Stääg überdräit. D Leiere, au Jochlaute gnennt, häi Säite, wo paralleel zur Decki und mäistens, aber nid immer, über e Stääg göön. D Säiten gönge über e Korpus uuse bis zum ene Jochstaab, wo zwäi Ärme mitenander verbindet.
• D Säite vo dr Ziddere si über e Säitedrääger gspannt, das cha e Staab, e Chaste oder e Schaale si. D Schwingige wärde über d Ändi vom Staab oder dr Raame überdräit.
• Bi de Harfene si d Säite sänkrächt zur Resonanzdecki, d Schwingige wärde also diräkt dur d Säite überdräit.

S Cembalo het Säite, wo dur Plektre in dr From vo Dörn aagrisse wärde, es zelt aber nid zu de Zupfinstrumänt, sondern zu de Dasteinstrumänt. Au Striichinstrumänt wärde mänggisch zupft; däm säit mä pizzicato.

En öiropäischs Zupforchester isch mit de Stimme 1. Mandoliine, 2. Mandoliine, Mandola, Gitaare und Kontrabass, wo im Allgemäine au zupft wird, bsetzt.

Weblingg

• BZVS: Dr Fachverband für Mandoliine- und Gitarremuusig im Saarland
• ATLAS of Plucked Instruments

Dä Artikel basiert uff ere fräie Übersetzig vu dere Version vum Artikel „Zupfinstrument“ vu de dütsche Wikipedia. E Liste vu de Autore un Versione isch do z finde.