Guillelmus Wallaceus (-i) sive Guillelmus Wallax (-cis)[1][2] (Lingua Scotica (Gadelica) Uilleam Uallas, [ˈɯʎam ˈuəl̪ˠəs̪] enuntiatum; Lingua Anglonormannica William le Waleys;[3] natus fere anno 1270; mortuus Londinii die 23 Augusti 1305) fuit eques Scoticus, qui primo de libertate bello Scotorum propugnator libertatis factus est.
Anno 1297 exercitu Anglorum devicto, Guillelmus Wallaceus custos Scotiae ("Guardian of Scotland") factus est, quo munere usque ad 1298 fungebatur, donec exercitus Scotorum a Guillelmo ductus proelio apud Falkirk commisso ab Anglis victus est. Mense Augusto 1305 Wallaceus prope Glasguam captus Eduardo I, regi Anglorum, traditus est, qui eum ob crimen laesae maiestatis ac rei publicae suspendio interimi, exenterari, et quadrifariam dividi iussit.
Vita Guillelmi Wallacei, quamvis historice parum accurata, in pellicula Braveheart (1995) praesentatur. Melis Gibson et pelliculam moderatus est et personam Wallacei gessit.