Pusane (in tagliàne Pulsano, in dialette salendìne Puzànu o Pusànu) éte 'nu comune tagliáne de 11.095[3] crestiáne ca se iacchie jndr'à vanne salendine d'a Provinge de Tarde, jndr'à Pugghie e jè 'u cchiù granne cendre de l'Aunione de comune "Terre d'u Mare e d'u Sole". Pusane jè 'nu comune costiere: 'u territorie comunale, infatti, jè vagnate da 'u Mar Ionio e se affacce sus a 'u Gurfe de Tarde cu 'na coste de 7,5 km cchiù o mene. 'U paesagge jè caratterizzate da vite e ulive secolare. Jè, da osce, 'u cchiù andiche 'nzediamende acchiate sus a 'u Gurfe de Tarde[4].
Apprisse l'epoche preistoreche e apprisse le dominaziune de grece (facìe parte d'a Magna Grecie) e romane, canuscìe l'egemonìe de frangise e spagnule, ca ne onne condizionate, cumme jndr'à tutte 'u Salènde, 'a lenghe. Le prengepàle resorse economeche sonde l'agricolutre e 'u turisme.
Sciugrafije fiseche
'A provinge de TardeLocalità "Lido Silvana", Marine de Pusane
Pe approfondimende, 'ndruche 'a vôsce Sciugrafije d'a Pugghie.
Pusane nasce jndr'à vanne salendine d'a provinge de Tarde, 20 km a sud-est d'u capeluèche, jndr'à 'n'arèe pianeggiande combrese 'mbrà le Murge Tarandine, 'u Mar Ionio e 'u Tavoliere de Lecce.
'A differenze de altezze d'u territorie comunale jè de 44 metre s.l.m. e 'u cendre storeche nasce a 'n'altezze de 37 metre. Comune costiere, pure ca 'u cendre javetate jè lundane cchiù o mene 2 km da 'u mare, tène 'na coste frastagliate e ricche de penisole piccenne (le "sette Punde"), ca formane a lore volte de le baie cu 'a rene.
'A marine 'nu tiembe ricche de vegetazzione, apprisse 'n'intense urbanizzazzione a 'a quale ha sciute 'ngondre jndr'à 'u XX sechele se presende assaije cemendificate. 'Mbrà le arèe naturale de preggie ste 'a granne arèe cu 'u vosche d'u "Vosche Caggione", ca spicce 'nguèdde a 'u mare. St'arèe, comungue, non g'ha sopravvissute a le fenomene de urbanizzazzione, avenne sofferte 'nzigne da le anne settande de 'nu forte abbusivisme de villette e seconde case, sùle in parte sanate cu 'a legge, ca ne ave cangiate assaije 'u profile naturalisteche[5].
Territorie
Confine
'U territorie comunale de Pusane jè delimitate a sud da 'u mar Ionio e confine a ovest e sud-ovest cu Leporano, a nord-ovest cu Tarde (purcé stè 'a frazione de San Donato), a nord e nord-est cu Faggiano e cu 'a fraziona soje San Crispieri, a est e sud-est cu 'n'exclave d'u comune de Tarde ca 'u separe da 'u comune de Lizzano[6].
Spiagge
L'arèe d'a Marine de Pusane jè caratterizzate da 'n'alternarse de scogliere e cale cu 'a rene, le prengepàle sò Luèchevive, 'A Fundane, Le Canne, Montedarene, 'Spedale Capparone (o Villa Verde), Pezzarusse, Serrone, Lido Silvane (addò, jndr'à 'u gurfe, stè 'n'isolotte scogliose, ca se raggiunge pure a nuote e, sus 'a quale spiagge sò presende angore osce a die, pure jndr'à 'nu numere cchiù ridotte rispette a 'u apssate, esemblare de ginepre coccolone ca mettene le radice lore 'mbrà 'a rene), Terrarusse e Lido Checca (ca tràse jndr'à suddette exclave d'u Comune de Tarde).
Idrografije
'U territorie comunale jè attraversate da doje corse d'acque piccinne probbie de nature sorgive a carattere temboranèe: 'u canale Trigna, canalizzate jndr'à 'u tratte ca passe pu quartiere omonime da 'u quale nasce, iesse in località 'A Fundane; 'u seconde corse d'acque nasce a le spalle d'u Vosche Caggione e, passanne da jidde e sotte 'a Litoranèe Salendine, iesse vicine 'a spiagge de Lido Silvana, nnande 'u vosche stesse. 'A risorgive da 'u quale iesse st'urteme corse d'acque jè famose e reportate sus a le carte d'u 'Stitute Sciugrafeche Militare cu 'a denominazione de "Sorgende Cannedde".
Clime
'U 'nvirne jè generalmende mite e piovose ma non ge sonde frequende le irruzzione de aria fredde da nord (l'accussìdette "sirratina" de le ballate locale)[7] e da est, ca quacche vote portane precipitaziune nevose.
Assaije cavede e afose jè 'a staggione, cu valore ca spesse raggiungene e, verte vote supranescene, le 40 grade. Le precipitaziune d'a staggione so probbie rare.
Classificazione climateche: zone C
Sismicità
Classificazione sismiche: zone 4 (sismicità vasce assaije).
Storie
Pe approfondimende, 'ndruche le vôsce Storie d'a Pugghie e Storie d'u Salènde.
Le origgene d'u toponime
Stonne 'nu sacche de ipotesi sus a l'origgene d'u toponime "Pulsano", nate probbabbilmende in epoche romane o medievale. L'ìipotesi cchiù accreditate dice ca 'u termine "Pusane" derive da “ab insigni abitantium pulsu”, ca signifeche da 'u puse forte de le javetande, o da andiche tornèe de puse sane (osce a die canusciute cumme "sciuèche d'u vrazze de firre") ca nobbile e benestande organizzavane jndr'à 'nu sbuènne de occasiune, cumme Natale, Pasche o, certe vote, jndr'à le periode de vendemmie e mietiture, 'mbrà le surdate e le cetadine cchiù forte[8]. Pò pare ca l'ause de sciucà a 'u sciuèche d'u puse jè angore cchiù andiche: se penze, 'nfatte, ca quanne le grecie arrevarene jndr'à ste zone, ggià jndr'à le tiembe d'a Magna Grecie, le javetande locale facevane già stu sciuèche ca, cchiù nnande, jndr'à le sechele, avenìe praticate pure da le leggionarie pusanise pe combattere 'a noie (osce a die jndr'à staggione, duranne 'a manifestazione "Puse Sane" se face 'nu tornèe de vrazze de firre 'mbrà le riune pusanise pe mandenè vive sta tradizione)[9].
'N'otra ipotesi jè ca u toponime avène da 'u nome latine Publicianus (o Plautius), une de le patrizie romane ca facerene de sta località 'a residenza soje d'a staggione ('u nome d'u patrizie pò essere pure state Publicius ca cu 'u suffisse -anus, ca indichesce appartenenze, ave date 'u nome de "probbietà de Publicius" a sta terre)[10].
Pure seconde 'n'otre penziere avèrene state le romane a nnomenà 'u villagge locale "Pulsanus"; prove de quiste jè 'a frase "militis a pulsu Pulsanus dictus ubique" ca indicave 'n'evenduale presidie a difese d'a marine o de Tarde. 'U nome Pulsanus avessa avenè da "pulsus" (spingè, respingè) o "puls" (puse, 'ndese cumme forze, vigore), tutte e doje seguite da 'u suffisse "-anus" (ca riguarde a le cetate, indichesce possesse e, jndr'à stu case, "Pulsanus" avessa indicà "d'a respinde" o "d'a forze")[8].
Angore, abbesogne dicere ca 'u nome Pusane pò essere ca avène da Pule, 'a porta de l'estrema zone a nord d'u javetate pusanese (addò osce a die stè 'a piane de Stigliano) addò avenèvane 'mbiccate le disertore. 'N'otra teorie dice ca 'u nome d'a cetate s'adda cercà jndr'à 'u nome latine fulix, folaghe, purcé 'u poste addò osce a die nasce 'u paese apprime ere 'na palude, javetate appunde da le folaghe.
Da 'u nome fulix se derive, sembre cu 'u suffisse -anus citate in precedenze, 'u nome fulcianus, cu 'u quale se indiche 'u luèche de le folaghe. Pe mutive legate a 'u dialette, 'a f de fulcianus addevendò p, devendanne Pulcianus e pò, pe traslazione, 'a località devendò Pulsanus[11].
Spiccianne, otre dicene ca, invece, 'u nome de osce a die de Pusane ha nate ninde ninde jndr'à 'u 1409, prima date utile addò se ave 'a prove de l'esistenze d'u termine "Puluetzanon", ca indichesce 'a zone corrispondende a quidde ca osce a die jè Pusane. Jndr'à 'u 1409, 'nfatte, le terre de Puluetzanon avenèrene lassate da Gemma, vedove de 'nu funzionarie bizzandine de Tarde, a le nepute. Da precisà ca cchiù vote, jndr'à le teste vicchie, Pusane jè arrecurdate cu 'u nome de "Pulzano"[12], da 'a quale avènene probbabbilmende le termine "puzanese" e "puzanisi", pe definìe le crestiane d'u poste.
Età andiche
'Mbrà 'u 1948 e 'u 1952 sus a l'altopiane d'a Castellucce, vecine a Lido Silvane, vecine a 'u litorale de Pusane, ha state scuperte 'u cchiù andiche 'nzediamende preistoreche 'nzigne a osce acchiate sus a 'u Gurfe de Tarde[4], ca resale a 'u XVI sechele n.C. e ca se pò mettere jndr'à l'età d'u bronze[13].
Le acchiaminde onne demostrate ca le javetande de stu 'nzediamende erane pescature ca se dedicavane pure a l'agricolture e avèrene tradiziune culturale e releggiose consolidate. Cu l'arrive de popolazziune nuève, 'mbrà l'XI e 'u XII sechele n.C. 'a stessa arèe ospitò 'nu 'nzediamende nuève, cchiù precisamende jndr'à zone 'nzeccate de Lido Silvane, presende pò pure jndr'à l'epoche magno-greche e romane[14].
Già apprime ca le coste d'a penisole italiche avèrene trasute jndr'à sfere d'influenze de le poleis greche (canusciute cumme Magna Grecie), 'u villagge tenève rapporte commerciale cu le popole de l'Eggeo cumme attestate da le numerose acchiaminde de cerameche micenèe. 'U puèrte de Pusane, però, non g'ha state maje acchiate purcé probbabbilmende sommerse; certe tracce jndr'à 'u specchie d'acque nnande a Lido Silvane, però, facene penzà a 'u acchiamende d'u stesse e osce a die se stonne a studiane sus a base, inzieme a le strutture acchiate sus 'a terraferme, de 'nu proggette museale e de 'nu parche archeologgeche; quiste adda permettere de stabbilìe cu maggiore precisione 'u ruole de Pusane e d'u puèrte sue pure jndr'à l'epoche magno-greche e romane[14].
'Mbortande pure 'a produzione de cerameche locale, in particolare de le dolii, 'na specie de giare cumme a chidde ca se acchiavane jndr'à l'Itaglie meridionale jndr'à l'età d'u bronze, ca avèrene decoraziune de tipe eggèe, micenèe e sub-micenèe.
Sembre jndr'à 'n'epoche apprime a quedde magno-greche, aqquà sbarcarene le Iapigge (aqquà jndr'à 'u Salènde chiamate Messape), ca non ge occuparene Pusane, cu 'a quale tenèvane alleanze e rapporte commerciale. Bella forte ere l'attività commerciale, ca ha state pure a 'a base de 'nu sbuènne de conflitte apprisse l'arrive de le sparane ca riuscirene a farse spazie sus 'a coste a nord de Pusane luanne a le messape apprime l'altepiane de Saturo, funnanne 'a cetate omonime, e pò 'u territorie addò pò avèrene funnate Tarde.
L'alleanze 'mbrà Pusane, Saturo e le messape (ca s'acchiavane jndr'à l'endroterre, da le vanne de Manduria e Orie) se mettìe condre pe 'nu sacche de anne a Tarde, allore a vota lore le Iapigge d'u cendre nord d'a Pugghie, ca erane le Peucezie e le Daune. Apprise a l'iniziale sconfitte, le pusanise, le messape e le crestiane de Saturo riuscirene, apprisse 30 anne de sottomissione, a costringere le tarandine a scè rrete 'u lore cambe d'azione 'nzigne a l'isola lore. Apprisse 'nu sacche de lotte, ca s'averene seguite jndr'à l'anne, se arrevò a 'n'alleanze: Pusane avenìe ridimenzionate (devendanne probbabbilmende 'n'inzediamende a difese de Tarde) e pigghiate accussì jndr'à Magna Grecie invece Saturo scombarìe; tutte e doje le località, pò, devendarene sede de residenze estive de nobbele tarandine.
Se arrevò a l'alleanze purcé stave sembre sus 'a zone 'a minacce de Rome, ca comungue riuscìe, successivamende, a pigghiarle jndr'à probbia sfere de 'nfluenze[15]. 'U Rre de l'Epire, Pirro, se servì d'u puèrte de Pusane pe sbarcà, cu le truppe sue, a difese d'a zone jndr'à stu periode.
Successivamende, sus 'a coste nascettere 'nu sbuènne de villae romane, certe de le quale angore osce a die visibbele (cumme quelle de Lido Silvane), purcé le Romane, cumme apprime le Grecie, facerene de Pusane località de villeggiature, godenne d'u mare e d'u vine locale. Jndr'à zone marine, apparte 'u villagge preistoreche d'a Castellucce cu le necropoli sue cu le chiaute "a grotticelle" (fatte da grotte piccenne, jndr'à 'u vosche de rrete) e a 'u successive 'nzediamende de epoche magno-greche e romane de Lido Silvane cu 'nzieme reste de 'na villa romane (o, se penze, de 'na strutture portuale) e de 'nu mosaiche romane scuperte pe case jndr'à 'u 1964 da turiste tedesche[16], onne state acchiate reste de doje nave (une romane e l'otre, se penze, greche) e de 'na necropoli de mammuth, sembre vecine a le 'nzediaminde d'apprime[17].
Da arrecurdà pure Aulonia (ca, seconde certe acchiaminde, nasceve jndr'ò località de osce a die, Luechevive, sus 'a coste pusanese) famose pu vine sue ma d'a quale, osce a die, se sape avveramende picche. Infine, certe acchiaminde jndr'à l'endroterre, jndr'à zone ovest d'u paese, onne attestate 'a presenze de 'nu villagge ca resale a 'a preistorie, cchiù precisamende a 'u periode d'u neoliteche (atturne a 'u 4000 - 6000 n.C.), in epoche apprime rispette a le villagge sus a 'u mare.
Medioeve
Vie 'nditolate a Giuanne Andonie de Falconibus a Otranto
Jndr'à l'endroterre, 'u castelle, inizialmende furmate da 'a sola Torre Quadrate (o Torre Massime) ca osce a die se affacce sus 'a Chiazze Castelle, ere addibite a tenute de cacce.
Jndr'à 'u 1100 'a popolazzione locale, probbabbilmende spingiute da le condinue scorribbande de le pirate, se spustò da 'a coste verse 'u 'nderne e acchiò rifugge apprime jndr'à zone ca corrisponne a 'u rione Scorcora de osce a die (addò stonne grotte sotto terre) e pò jndr'à quedde ca allore ere l'uneca torre d'u castelle, ca non ge se ìndrucave da 'a coste. Probbietà de 'nu sache de famigghie duranne le anne, 'u castelle "De Falconibus" pigghie 'u nome da 'a famigghie ca l'ave allariate e purtate a le dimenziune de osce a die (certe vote arrecurdate cumme "delli falconi" o "de li falcuni").
Jndr'à 'u 1326 Renzo De Falconibus murìe duranne 'a difese de Pusane da 'n'assalte jndr'à 'nu tratte de coste ca da allore se chaime Terrarosse, pe arrecurdà 'u fatte sanguinose. Jndr'à 'u 1480 le truppe pusanise, capitanate da Giuanne Andonie Delli Falconi (figghie de Marine, quidde ca purtò 'u castelle a 'u state de osce a die), pigghiò parte a 'a spedizione a Otranto pe difennere 'u Salènde da le attacche de le turche. Giuanne Andonie Delli Falconi avenìe 'ngfarecate da 'u Rre de Napule, 'nzieme a 'u tarandine Frangische Zurlo, de pigghià 'u comande d'a situazione a Otranto.
Apprisse ca avère tendate de affrondà 'a minacce turche (numerecamende troppe superiore) e apprisse ca avère tendate de trattà 'a pace, le 2 capitane decidettere de achiudere 'a cetadinanze jndr'à cetate e tendà 'a resistenze. Apprisse doje sumàne, Otranto cadìe e le turche 'a conguistarene.
'Mbrà le muèrte a mundone stavane pure le 40 surdate pusanise, combrese 'u rambolle De Falconibus (a 'u quale succedette 'u frate sue Cosimo, o "Cosma", De Falconibus; l'otre frate, Rafaele, ere ambasciatore de le aragonese jndr'à Frange)[18]. 'A cetate avenìe libberate sulamende 'n'anne apprisse, l'8 settemmre 1481, sciurne jndr'à 'u quale a Pusane se festegge 'a Madonne de le Martire, pe arrecurdà le pusanise muèrte addà. Sembre jndr'à 'u 1481, 'u ggià gravemende malate sultane ottomane Maomette II facìe arrecapetà, apprime d'a morta soje, 'na statue d'a Madonne de le Martire a 'u castelle de Pusane in onore a 'u geste eroiche combiute da le pusanise a Otranto; quedda statue jè angore osce a die onorate e purtate in prugessione 'nzieme a quedde de San Trifone duranne le festeggiaminde pe le festività patrunale[19].
Jndr'à 'u 1980 le autorità pusanise 'ngondrarene chidde otrandine pe arrecurdà le martire de quedde epiche vicende[15]. A Otranto, jndr'à 'u cendre storeche, stè pure 'na vie 'ndestate a Giuanne Andonie Delli Falconi, 'mbacce a 'na vie 'ndestate a l'otre capitane, 'u tarandine Frangische Zurlo.
Quanne ste spicciave 'u XVI sechele le spagnule 'nzipparene 'na torre de avvistamende costiere nnomenate "Torre Castellucce", sus a l'altopiane ca porte 'u stesse nome. Sta torre, 'nzieme a le otre fatte 'nzippà da le spagnule, avenìe costruite cumme difese da 'u condinue rischie de 'nvasiune saracene. Facìe parte d'u 'Mbere Bizzandine (VI-XII sechele) e successivamende d'u Pringipate de Tarde a 'u 'nderne d'u Regne de Sicilia(XII sechele - 1262) apprime e d'u Regne de Napule (1262-1816) pò.
Età moderne e condemboranèe
Terra d'Otranto
Jndr'à 'u 1647 'a popolazzione se revultò condre a le Muscettola (ca jndr'à 'u 1617 avèrene accattate le feude de Pusane e de Leporano) pe le 'mboste ierte; stu fatte jè canusciute, jndr'à le libbre de storie locale, cumme "rivoluzione pusanese".
L'epidemije de peste d'u 1656 reducìe assaije probbie 'a popolazzione. Le terramote violende d'u 5 aguste 1742 e d'u 20 febbrare 1743 onne state probbabbilmende 'a cause de l'abbandone definitive de l'inzediaminde d'a coste (in mare stonne tracce de pavimendaziune vecchie). 'Mbrà 'u Sttedine e 'uUettecinde jndr'à le territorie de Pusane e Leporano se sviluppò assaije probbie 'a cotonicolture; jndr'à stu periode nascerene assaije norie (dette 'ngegne jndr'à 'u dialette locale), strutture angore osce a die visibbele dotate de 'mbiande de sollevamende idriche a trazione animale.
Pusane avìe pure 'na probbie costituzione ca avenìe promulgate da 'u pirngipe Giuanne Andonie Muscettola spingiute da le forte ideale patriottece de le pusanise, pe 'n'assette carbonare piuttoste consolidate jndr'à cetadine. Giuanne Giannone, sindache pe uette vote, sarvò a spese sue 'a cetadine da 'u colere, accattanne quintale de cauce da spannè jndr'à tutte 'u paese cumme andisettiche. A levèlle statale, passò da 'u Regne de Napule a 'u Regne de le Doje Sicilie (1816-1860) e, pò, a 'u Regne d'Itaglie, quedde de osce a die 'a Repubbleche Tagliàne. Cu l'eversione d'a feudalità jndr'à 'u Regne de Napule (1806), avenìe istituite 'u comune de Pusane, ca 'mbonde a 'u 1820 tenève pure 'u javetate de Leporano[20]
Apprime ca, jndr'à 'u 1860, cercunnate e destritte avenèvane abbolite, Pusane faceve parte d'u circondarie de San Giorgie a 'u 'nderne d'u Distrette de Tarde jndr'à Provinge de Terra d'Otranto (pò Provinge de Lecce). Jndr'à 'u 1923 Pusane trasìe a fà parte d'à nova Provinge d'u Jonio (da 'u 1951 provinge de Tarde), pigghiate probbie da l'abbolite Distrette de Tarde.
Quanne, jndr'à l'assemblèe costituende, se stabbilìe pa prima vote 'a nascite de l'ente "reggione", 'a Pugghie e 'u Salènde erane divise e Pusane faceve parte de quest'urteme; pò, a l'attuazzione vere e probbie de le reggione, 'a reggione Salènde avenìe mise jndr'à Pugghie (cu conseguende tendative, jndr'à l'anne, de separazione).
'U 25 sciugne 2001 'n'incendie avere devastate 48 ettare d'u Vosche Caggione de Lido Silvane, distruggenne 'nu sbuènne de case e quacche esercizie commerciale e colpenne 'u 'ndere settore turisteche d'a cetadine.
Simbole
'U stemme cetsdine nuève jè diverse da quidde vecchie, apparte pa rivisitazione de le eleminde 'nderne a 'u scude (ca non ge onne cangiate, ma onne state redisegnatye), pa corone: non g'è cchiù quedde a code de rondine, caratteristeche de le comune ordinarie, ma quedde turrite cu 5 torre visibbele, ca spettane a le comune insignite d'u titole de cetate[21].
Le caratteristeche d'u stemme e d'u gonfalone d'u Comune sonde le seguende:
'U stemme d'u Comune de Pusane jè fatte da 'nu scude cu sus 'na corone regale d'ore. 'U scude face vedè 'nu ciele azzurre sus a 'nu cambe verde sus a 'u quale 'nzistene ttre fiure: 'nu gladiole gialle, 'nu papavere russe a cendre e 'na margherite vianghe. Sus a 'u papavere gire 'n'ape. Da 'a vanne superiore d'u scude s'appenne tre cerase.
'U gonfalone jè fatte da 'nu panne vianghe e ave 'a forme de 'nu trapezie rettangole, 'u late verticale affianghe a le angole rette jè frastagliate, a greche, invece 'u late obblique, opposte, jè divise jndr'à cinghe vanne uguale danne luèche a ttre greche: doje laterale e une cendrale. A 'u cendre d'u gonfalone ste 'u stemme d'u Comune decorate angore de cchiù, lunghe le doje late laterale, da doje fronde: une de ghiande e l'otre de mirtille, legate a le pide da 'nu fiocche de nastre russe. 'A corone jè suverchiate da 'a scritte: Comune di Pulsano.[22]
Onorificenze
Titole de Cetate - nastrine pe uniforme ordinarie
Titole de Cetate
Monuminde e luèche de inderesse
Architetture releggiose
Chiesere de Sanda Marije 'A Nove, jè 'a chiesere matrice e l'uneca chiesere parrocchiale cetadine, proclamate "sanduarie mariane" l'11 febbrare 1947, anniversarie de le assute mariane a Lourdes. Jndr'à 'u 'nderne se iacchie 'nfatte 'na riproduzione d'a grotte de Lourdes, fatte jndr'à 'u 1933 cumme vote d'u dottore Delli Ponti, ca ha state brucate addà pe 'nu sacche de tiembe.
Comungue, l'11 febbrare, jè feste cetadine. 'A chiesere ave 'nu cambanile ierte, uneche jndr'à zone, inaugurate 'u 30 marze 1980, fatte, in sostituzione d'u vecchie e modeste cambanile, pe opere d'u parroche, don Franghe Limongelli, ausate a signalà 'u sanduarie a tutte 'u cercondarie.
'A strutture ha state recendemende restrtutturate. Jndr'à chiesere stonne pure 'nu cappellone in onore a San Trifone (prutettore d'u paese) e 'nu sbuènne de statue, sistemate jndr'à nicche sopraelevate. 'A chiesere de Sanda Marije 'a Nove avenìe costruite partenne da 'u 1838 (e affrescate da 'u carrino) ausanne materiale d'a chiesere madre vecchie de Pusane "Madonne d'u Carmine" e ha state suggette pe doje vote a asckuaminde: jndr'à 'u 1882 e jndr'à 'u 1957. Vecine 'a chiesere se iacchie 'na necropoli precedende a l'istituzione d'u cimitere comunale a Pusane.
Convende de le Attane Minore o Reformate - palazze d'a culture, jè d'u Settecinde e tène dipinde, statue e 'na raccolte de pupe siciliane, ca in passate davane vite, sembre in convende, a 'nu presepe. Jndr'à 'u convende, ca tène forme quadrangolare e ca ave l'endrate revolte a ovest, jè presende 'n'affresche de l'urtema cene ca se iacchie jndr'à 'nu refettorie, occupande 'n'indera parete e dipinde jndr'à 'u 1727 da Gesèppe Bianco.
'U convende, ca all'inizie ere 'na fortezze, se sviluppe sus a doje piane e jè dotate de 'nu puzze, ca pe anne ave servite 'a cetadinanze pusanese. 'U convende 'nu tiembe ospitave le sore Stimmatine, osce a die se iacchiane a Marine de Pusane ma pronde a fà retorne quanne spicciane le fatìe de restrutturazione.
Apprisse 'a recende fase de restaure, 'nfatte, avène redate a 'a cetadenanze e pare ca adda funzionà da condenitore pe le associaziune culturale locale. In proggette, pò, 'nu musèe a 'u 'nderne sue ca pò condenè le acchiaminde de le 'nzediaminde costiere pusanise (chisse ca osce a die stonne jndr'à 'u Musèe Archeologgeche Nazionale de Tarde e chidde ca putessere essere repurtate a 'a luce grazie a stu proggette= e 'na sale multimediale cu recostruziune storeche de le stesse javetate[14].
Pò, onna fà pure manifestaziune culturale, onna trasfeì 'a bibblioteche comunale e quacche locale adda essere ausate a foresterie. Adda essere repristinate, pò, 'a funzione liturgeche d'a chiesere e d'a sagrestìe affianghe, sospese jndr'à l'anne ottande cu l'avvie d'u restaure.
Chiesere de Sanda Marije de le Martire, attaccate a 'u convende, avenìe costruite jndr'à 'u 1518 e dedicate a 'u martirie de le pusanise a Otranto jndr'à 'u 1480 (pò a Pusane se festegge 'a Madonne de le Martire ca, 'nzieme a San Trifone, jè 'a protettrice d'u paese probbie da le tiembe de quidde fatte brutte). 'A chiesere, ca se iacchie sus a 'u late sud d'u convende, ospite 'n'icone d'a Madonne cu 'u Piccinne; queste icone avène da 'a chiesere vecchie, destruttre atturne 'u 1100.
Chiesere d'a Confraternite d'u SS. Sacramende (o de l'Oratorie), jndr'à 'u cendre storeche. Jè dotate de 'nu cambanile piccinne e se iacchie affianche a 'u luèche addò s'acchiave 'a vecchia chiesere madre "Madonne d'u Carmine"[15], osce a die non cchiù presende, sotte 'a quale stè angore 'na vecchia necropoli.
Chiesere d'a Confraternite d'u Carmine (o d'u Priatorie), jndr'à 'u cendre storeche. Tène 'nu cambanile piccinne e aqquà stonne stipate le statue ca 'na vote a l'anne, duranne 'a sumàna sande, donne vite a 'na prugessione de le mistere. Jè 'u luèche cchiù vecchie sacre pusanese e aqquà avenèrene benedette le martire d'Otranto, jndr'à 'u 1480, apprime de partì[15].
Ospitesce 'a confraternite emonime ca organizze ogne anne 'a pruggessione e 'a feste d'a Madonne d'u Carmine, 'u 16 luglie. 'A Confraternite avenìe funnate jndr'à 'u 1687, ma ggià da 'u 1864 stonne tracce de l'esistenze d'a chiesere. Jndr'à 'u 2012 'u Consiglie Comunale de Pusane ave attribbuite a 'a confraternite 'u titole de "Arciconfraternite".
Chiesere d'u Sandissime Crugefisse, cu 'nzieme l'orte botaneche, in periferie, mete de pellegrinagge duranne le venerdìe de màrze da vanne de fedele ca arrivane a pide da le pajesere vecine. Quiste avvene purcé 'na leggende vole ca 'n'andiche ex-surdate, ca tenève in custodie 'a chiesere, acchiò, a 'u retorne sue da 'n'escursione a Martina Franghe, 'nu crugefisse de legne a 'u 'nderne d'a chiesere. Stu crugefisse, de autore scanusciute, resale a 'u XV sechele e osce a die se iacchie jndr'à chiesette, costruite jndr'à 'u 1840 sus a l'andica cappelle d'u Quattrecinde de San Necole e ca, jndr'à 'u piazziale de nnande, stonne 7 croce ca rappresendane 'a Via Crucis. Vecine 'a chiesere d'u Crugefisse ste 'u cambesande, ausate da le comune de Pusane e Leporano nate jndr'à 'u 1820 e 'nditolate a l'ex parroche don Bruno Falloni.
Chiesere Stella Maris, a Marine de Pusane, vecine 'a quale 'u 15 aguste de ogne anne se organizzane fuèche artificiale e 'na prugessione de varche in mare ca carresciane 'na statue d'a Madonne. 'A chiesere face parte d'a vicarie de Pusane e ospitesce regolare funziune liturgeche duranne tutte l'anne.
Chiesere Madonne d'u Pescatore, andiche cappelle votive ca avenève ausate pe le celebrazziune funebre e addò se facevane le festeggiaminde pe l'arrive d'a primavere; aqquà avenèvane pure istruite a l'ause de le arme le uagnune carbonare.
Chiesette d'u cambegge, costruite jndr'à l'anne settande a 'u 'nderne d'u storeche cambegge de Lido Silvane e sopravvissute a 'u 'ngendie d'u 2001.
Monumende a le Cadute d'a seconda uerre mundiale.
'Nu sacche de necropoli.
Statue de San Pio, in Chiazze San Pio.
Case de Don Benedette Calati.
Architetture civile
Palazze Giannone, residenze private uettecendesche, appartenute a l'omonime, uette vote sinnache, ca jè sede d'a Pro Loco de Pusane, d'u SER (Servizie Emergenze Radio) e ca ospitò, pe 'nu belle picche de tiembe, 'a Bibblioteche Comunale de Pusane, ca osce a die se iacchie jndr'à 'u Municipie.
Palazze Pavese.
Palazze Sannino.
Muline Scoppetta, recanusciute monumende nazionale cu D.M. d'u 10 scennare 2001[23], ave fatte farine paste da 'u 1879, anne jndr'à 'u quale Frangische Scoppetta 'u costruì, a 'u 1970. A 'u cendre dìu territorie dedicate a l'agricolture, facìe de Pusane, 'nzieme a Altamura, 'a capitale pugghiese d'a moliture d'u grane.
'U muline, ca tène 'nu sbuenne de recanusceminde, ha state recanusciute bene archeologeche d'a Sovrintendenze a le Bene Culturale purcé jè l'uneche e cchiù famose esembie in Itaglie de muline a cilindre ca stipe angore tutte le macchinarie a 'u 'nderne, e tutte in condiziune bbuène[24].
Jndr'à globbalitò, comungue, l'edificie storeche presende 'nu forte degrade, d'u quale se ave da tiembe 'nderessate 'u CNR, pure jndr'à generale ca le istituziune locale no se ne futtene ninde[25]
Musèe de l'Arte Contadine "Papale", appene fore 'u rione Crugefisse, vecine a l'omonime cappelle.
Tiatre Andrea De Maroc (i "Palatrappito"), recendemende restrutturate.
Andiche acquedotte, appene fore 'u rione 'A Lupara.
Andiche massarie.
frandoie (trappitu) abbandunate jndr'à certe grotte sotterranèe jndr'à 'u rione Scorcora. In passate, onne state storie de muèrte e sanghe.
Aviosuperficie de Mondicchie, sede d'u Circole de Aviazione Sportive Mondicchie e de 'nu cercuite de cavaddere.
Architetture militare
Località "Lido Silvane", Marine de PusaneLocalità "Le Canne", Marine de Pusane
Castelle De Falconibus. Se iacchie jndr'à 'u cendre idelae d'u paese, se acchiave jndr'à l'angole nord-est de le andiche mure pusanise, cu 'a trasute revolte a ovest, sus 'a chiazze. Se sveluppe sus a 3 piane e ave chiande quadrangolare e 5 torre de base e dimenziune differende. 'U castelle ere all'inizie furmate da 'a sole TOrre Quadrate (o Torre Massime) ca osce a die se affacce sus a Chiazze Castelle e avenève ausate cumme tenute de cacce.
Jndr'à 'u 1100 'a popolazzione locale, probbabbilmende spingiute da le condinue scorribbande de le pirate, se spustò da 'a coste verse 'u 'nderne e acchiò refugge jndr'à torre, ca non ge se 'ndrucave da 'a coste. Le De Falconibus accattarene 'a torre semifatiscende e allariarene 'u stabbile costruenne le otre quattre torre (tutte diverse). Jndr'à 'u 1274 'u castelle e 'u feude averane devendate possesse d'a famigghie Sambiasi, jndr'à 'u 1350 passarene a F. Dell'Antognietta ca, cchiù nnande, vennìe 'u castelle a Ercole Petugy, ca recostruìe 'a Torre Quadrate. Pò, cchiù nnande, le De Falconibus turnarene e, apprisse 'a distruzione d'u castelle accadute jndr'à 'u 1388, accumenzarene a recostruirle jndr'à 'u 1400, spiccianne le fatìe jndr'à 'u 1435[26]. Pe stu mutive, angore osce a die 'u castelle jè nnomenate "Castelle De Falconibus". Da aqquà parte 'nu sottopassagge (osce a die murate) ca 'u colleghe a 'u castelle de Leporano e a 'u mare. 'U castelle, passate jndr'à le probbietà de le Muscettola apprisse ca avere state possedute da otre famigghie, tenève 'nu fossate e 'nu ponde levatoie. A le prime d'uUettecinde, pe volere de Giuacchine Murat le tre cannune ca stavane ospitate addà jndre avèrene state carresciate a Tarde pe essere ausate pa difese d'a cetate condre a le spagnule. Jndr'à 'u 1819 'u pringipe Giuanne Muscettola avere date in affitte l'arèe d'u fossate a otre famigghie ca 'u usarene cumme orte. Stu fatte dure angore osce a die, purcé jndr'à le mure a nord e est, 'nzieme a tre de le cinghe torre resultane combletamende 'nglobbate jndr'à 'u tessute de le probbietà 'nzeccate, scunnute da le lore parete. De cchiù, 'nzigne a le anne novande pure vanne de le cinde a Sud resultave scunnute, purcé ere ausate da appogge pe 'na costruzione piccenne de inizie '900, sede 'nzgine a le anne settande d'u telefone pubbleche, pò scettate 'nderre. 'U castelle, accattate a 'u patrimonie comunale jndr'à 'u prime Novecinde grazie a Giuanne Giannone, ca l'accattò apprisse 'a morte de l'urteme erede maschele de le Muscettola e 'u rialò a 'u comune, stipe le stemme de le De Falconibus e de le Muscettola e jè osce a die addibite a mostre d'arte, ospite 'u consiglie comunale (ave ospitate, pe 'nu paje d'anne, 'nu presepe vivende e, pe 'nu sacche de anne, 'a sede comunale ca osce stè jndr'à 'n'otre edifice, apposte apposte costruite, 'nditolate "L. Sturzo"). Stipe framminde de decoraziune pettoreche e certe rilieve lapidei piccinne.
Torre d'u Rrelogge e otre reste de le mure de Pusane. 'A torre, costruite sus 'a vecchie guardiole d'a Porta Maggiore accumenzò a funzionà jndr'à 'u 1748, avenìe destrutte da 'u terramote d'u 1954 e, apprisse l'iniziale recostruzione ca ne remettìe in seste 'u rrelogge e sisteme cambanarie, avenìe restrutturate jndr'à 'u 2006. Faceve parte de le vecchie mure pusanise pure 'a torre ca se iacchie 'mbrà le case de vie Muline Vicchie.
Torre Castellucce, torre costiere d'avvistamende andisaracene ca se iacchie a Marine de Pusane. Jè cercunnate da le reste de le javetaziune primitive d'u villagge preistoreche.
vedette bunker in cemende armate fatte lunghe 'a coste duranne le uerre mundiale.
Arèe naturale
Vosche Caggione, furmate soprattutte da pine d' Aleppe, se iacchie jndr'à l'omoneme contrade, vecine a Marine de Pusane, e jè 'n'arèe verde de dimenziune granne assaije, estese in passate da 'u Mar Piccele 'mbonde a 'a zone de Monacizzo e condraddistinde da 'a presenze de volpe e cunigghie. 'A vanna de sotte jè attraversate da 'a Litoranèe Salendine ca delimitave le doje zone de 'nu cambegge ca ere 'mbrà le cchiù granne d'Europe[27]. 'Mbrà 'a fine de le anne cinguande e l'inizie de le sessande quiste avera essere inaugurate da l'attrice Silvane Pampanini, cose ca avere date a 'a zone 'u nome de Lido Silvane. Jndr'à 'u 2001 'n'ingendie de proporziune granne assaije ave destrutte 'nderamende l'arèe vasce d'u vosche, addò stave 'u cambegge e assaije de le vecchie e nove ville e seconde case private; 'a vanne ierte, 'nvece, s'avere sarvate. L'arèe vasce ha state comungue tiatre de 'na straordinarie reviviscenze de macchie mediterranèe marine, biotipe autoctone cumme 'a foreste de pine d'Aleppe ma de presenze cchiù rare. 'U vosche ospite 'u cchiù vecchie 'nzediamende preistoreche acchiate fine a osce jndr'à 'u Gurfe de Tarde[4], 'n'nzediamende successive de epoche magno-greche e romane e Torre Castellucce, fatte 'nzippà da le spagnule jndr'à 'u Cinghecinde pe difendere 'a zone da le attacche de le saracene.
'Nu sacche de spiagge.
grotte in località Scorcora.
Site archeologgece
villagge protostoreche, reste sus a l'altepiane d'a Castellucce.
'nzediamende preistoreche, reste in località Angalone.
tembie dedicate a Dioniso, reste in località Stigliano.
doje ville romane, reste in località Lido Silvane.
strutture portuale, reste in località Lido Silvane.
andiche mure d'u puèrte, reste in località Luèchevive.
Otre
vicole d'u cendre storeche.
cripte cu graffite de epoche bizzandine, in località Mondicchie.
Suggettate
Evoluzione demografeche
Crestiane censite
'A popolazzione furastiere arrive a 173 crestiane.[28].
Lènghe e dialette
Arèe addò avènene parlate le dialette meridionale, 'mbrà le quale 'u salendine
«Firmò li Turcki, nanti alla marina
ma si 'rinnì ti retu, alla štrascina
ti fierru e ti cimentu 'nkannatori
ka è 'cisu vosku, mari, cielu e korj.»
(Tito Lucchese, La Kaštiduzza, poesie in dialette pusanese)
Apparte 'u tagliàne a Pusane s eparle 'u dialette pusanese, 'na variande d'u dialette salendine (certe vote considerate 'na lènghe vere e probbie) de tipe brinnesine, assaije diverse a 'u dialette tarandine. Quiste succede jndr'à tutte le comune d'a provinge de Tarde a sud d'u capeluèche purcé recadene jndr'à sub-reggione Salènde, a differenze de le pajesere a nord d'u capeluèche (e d'u capeluèche stesse, seconne 'a dottrine ca ritiene discriminande 'u dialette e 'a culture a le dine d'a determinazione de le confine salendine). 'U dialette salendine face parte d'a famigghie de le dialette "meridiunale estreme" 'nzieme a 'u siciliane e a 'u calavrese parlate jndr'à vanne sud d'a Calavrie. Da aquuà 'a differenze cu le dialette pugghiese ('mbrà le quale 'u tarandine), ca appartenene a 'a famigghie de le dialette "meridiunale"; comungue, stonne 'nfluenze sottile sus a 'u tarandine ca 'u facene jndr'à quacche mode differenzià da le otre dialette pugghiese: 'u tarandine jè definite, 'nfatte "pugghiese de transizione" o "apule-salendine".
Releggione
'A releggione cchiù diffuse jè 'u cattolicesime de rite romane. A Pusane esistene doje confraternite: quedde d'u Priatorie (o d'u Carmine), a 'a quale ha state recendemende attribbuite 'u titole de "Arciconfraternite", e quedde d'u Sacramende. De particolare preggie sonde pure doje opuscole de argomende releggiose ca resalene a 'a fine d'u XVIII sechele.
Culture
Bibblioteche
'A bibblioteche comunale jè 'nditolate a "Pitre Mandrillo", figure de spicche d'u panorame culturale pusanese. Avenìe istituite jndr'à 'u novemmbre 1958 cu 'u patrimonie libbrare de cchiù o mene 1.000 volume e d'a raccolte de le Legge e Decrete d'u Regne de le Doje Sicilie e quedde d'u State Tagliàne. Ospitate in passate presse 'u Castelle De Falconibus e pò a Palazze Giannone, da 'u 2006 ave sede cumme l'ex sale consigliare d'u Municipie, in vie De le Orte. Osce a die 'a bibblioteche tène cchiù o mene 7.000 volume, 'mbrà le quale 'nu forte numere de pubblicaziune d'u Uettecinde e de ediziune apprime d'u 1945[29].
Sò preesende pure 'nderessande bibblioteche presse le sede scolasteche e, de particolare 'nderesse jè quedde d'a Scole Giannone, avviate subbite apprisse 'a costruzione de l'edificie jndr'à l'anne '50.
Musèe
'U musèe de l'Arte Contadine "Papale", ca se iacchie jndr'à 'n'ex manifatture de tabbacche a 'a periferie d'u paese tène cchiù o mene 500 stuèzze. Se prevede pò l'istituzione de 'nu pole museale pusanese[14][30] in quande 'u Convende de le Attane reformature (cd. "Palazze d'a culture") jè a 'u cendre de 'nu proggette ca vulesse istituì jndr'à a jidde 'nu Musèe Archeologgeche ca ospiterebbe le reste acchiate presse le 'nzediaminde purtate a 'a luce sus 'a coste pusanese (addò, 'mbrà l'otre, stè 'nu proggette de 'nu parche archeologgeche). Jndr'à stu sienze 'nderessande jè pure 'na collezzione private de cchiù de 200 vase de età arcaiche, classeche e medievale. Le proggette ca riguardane 'a revalutazione d'u Muline Scoppetta, 'a ripavimendazione d'u cendre storeche, l'isolamende d'u castelle (osce a die cercunnate pe ttre quarte d'u perimetre sue da javetaziune) e 'a sistemazione d'a javetaziune d'u monache camaldonese Benedette Calati[30] condrebbuirebbere pure lore a 'a revalutazione storeche de Pusane.
Media
'A prima emittende radiofoneche locale ha state "Radio Tele Mare (RTM) 103.100 MHz"[31], ca ave trasmesse da 'u 1978 'nzigne 'u 1984, in congomitanze cu le prime staziune radiofoneche provingiale[32] affianghe a le primissime emittende libbere naziunale. Otre emittende onne state "Radio Mare 2", "Radio TEMPO Stereo", "Radio Pusane Cendrale", "Radio Oasi Stereo Pusane".
Jndr'à l'editorie stambate, 'nu sacche de iniziative se onne succedute da 'u seconde dopeuerre a osce a die. 'Mbrò le prime citame 'u pioneristeche sumanale de attualità cetadine "Blue Sky", fatte jndr'à l'anne '50, 'nzigne a 'u sumanale "La Controra" de le anne novande. Osce a die ste 'u mensile "Il Taccuino" 'u quale, 'nzigne a 'u 2011, s'ave occupate sulamende de Pusane ma mò parle pure de le vicende de le pajesere 'nzeccate Leporano, Lizzano, Faggiano, Roccaforzata e San Giorgie Ioniche. Pò ha state istituite 'u bimestrale conunale "LuogoVivo" (pu nome se onne ispirate a 'na località de Marine de Pusane) ca parle de l'attività de l'amministrazione comunale. Jndr'à 'u cambe culturale, apprisse 'na restrutturazione de cchiù o mene 'nu decennie, a 'a fine d'u 2009 ha state riaperte 'u tiatre piccinne "Palatrappito" (chiamate accussì purcé nasce addò in passate stave 'nu frandoje, "trappitu" in dialette locale). 'U tiatre, apprisse 'a restrutturazione, ha state 'nditolate a 'u storeche pusanese Andrea De Marco. Le doje cinematografe d'u paese sò invece oramaje achiuse da anne. Doje le film girate 'nderamende, o sole 'na parta piccenne, a Pusane:
Mamme le turche!! (it. Mamma li turchi!!), (1989)
Agghia essre 'u giudice tune (it. Sarò il tuo giudice), (2001)
Scole
A Pusane ave sede l'istitute combrendive "Giuanne Giannone" (ca ave recendemende assorbite l'ICS "De Nicola"). Pe l'istruzione superiore (apprisse l'esperienze passate d'a succursale d'u licèe "aristosseno" de Tarde) a Pusane ave sede l'Istitute Alberghiere "Mediterranèe" (cu succursale a Fragagnano e Marugge). Attive pure l'Istitute Musecale "W. A. Mozart" e 'a sucursale de l'Istitute Pianisteche Superiore "F. B. Mendelssohn" de Taurisano.
Cucine
Duranne 'a staggione pusanese se tènene 'nu sbuenne sagre ca permettene de assaggià le piatte e le prodotte tipece d'a zone. 'Mbrà le prodotte tipece arrecurdame paste, pesce, frutte (e jndr'à 'nu mode particolare le fiche, le fiche d'Indie e l'uve), patane, ortagge, formagge (case recotte, recotte e casecavadde), uegghie e vine. Pusane jè une de le tappe luènghe 'a Strade d'u Vine e 'a Strade de l'Uegghie; le doje strade collegane le cendre de produzione de vine e uegghie d'a vanne salendine d'a Provinge de Tarde. Pu vine, Pusane face parte d'a Strade d'u vine d.o.c. Lizzano e Primitive de Manduria 'nzieme, apparte le comune salendine rumanende d'a provinge de Tarde, a Erchie, Orie e Torre Sanda Susanne, in Provinge de Brinnese; se producene, 'mbrà l'otre, 'u Primitive e 'u Negramaro. Pe l'uegghie, aqquà se produce cumme jndr'à tutte 'a provinge de Lecce, cumme in parte quedde de Brinnese e cumme jndr'à rumanende vanne oriendale d'a provinge de Tarde, l'uegghie salendine, cioé l'Uegghie Terra d'Otranto DOP, a differenze de le pajesere d'a vanna occidendale d'a provinge de Tarde (e d'u stesse capeluèche) addò se produce l'Uegghie Terre Tarandine. 'Mbortnade pure 'a produzione de doce.
Personalità legate a Pusane
San Giuanne da Matera (Matera, 1070 cchiù o mene - Fogge 1139), monaco. Vivette a Pusane e funnò, sus a 'u Gargano, l'Abbazzie de Pusane in onore sue.
Benedette Calati (Pusane, 1914 - Camaldoli 2000), priore generale d'a congregazione de le camaldolese.
Cosimo Fornaro (Pusane, 1928 - Tarde1992), scrittore e poete, vingitore d'u Premie Viareggio de poesie jndr'à 'u 1976[33] e autore de sagge e romanze[34] ca l'avene rse 'u cchiù note screttore nate a Pusane[35].
Giuanne Sperti (Manduria, 1973), ballerine e personagge televisive, cresciute a Pusane.
Andonie Guzzone (Pusane, 1965), cestiste de levèlle nazionale[36].
Maurizio Turco (Tarde, 1960), deputate radicale, cresciute a Pusane.
Jangele Antonazzo (Tarde, 1981), sciucatore de ballone, cresciute a Pusane.
Emilio Pucci (Pusane, 1961), ggià ricercatore d'a Funnazzione Rosselli[37], e osce a die editore 'ndernazionale de pubblicisteche sus 'a comunicazione[38], vissute a Pusane 'nzigne a le anne ottande.
Robberte Delli Ponti (Pusane, 1904), ex sciucatore de l'Inter.
Avveneminde
Feste releggiose
Pusane jè mete releggiose pure pa soje prugessione de le Mistere d'u venerdìe sande, organizzate da l'Arciconfraternite d'u Priatorie[39]. 'U venerdìe Sande de ogne anne 'na prugessione de "perdune" "nazzecande" attraverse 'u javetate pe totte 'a nuttate, purtanne cu lore le statue ca raffigurescene 'a passione de Criste.
'A prugessione ha state annoverate da 'a Reggione Pugghie 'mbrà chidde cchiù rappresendative d'a sumana sande pugghiese e, seconne andiche scretture, pare ca jè cchiù andiche de quedde de Tarde, purcé resale a 'a metà d'u 1600. Le statue, in legne cu le uecchie de cristalle, avenèrene scolpite a màne 'mbrà 'u '700 e 'u '800. 'A feste patronale de San Trifone ('u quale culte maturò a Pusane 'mbrà 'u 1810 e 'u 1812 duranne 'u periode de pestilenze e cu 'a migrazione de 'nu sbuènne de famigghie ca avenèvane da 'a zone de Alessano, addò 'u culte d'u sande ere ggià consolidate; comungue 'u prime riferimende scritte sus a San Trifonea Pusane jè d'u 1822 e, 'u culte sue, pò essere ca s'ha sveluppate apprisse quacche 'nvasione de 'nzette, purcé jndr'à Grecie e, successivamende 'mbrà 'u 1400 e 'u 1900 pure a jndr'à 'u sud Itaglie, avenève tenute assaije in considerazione pa salvaguardie de le coltivaziune da le 'nvasiun de 'nzette e rettile) e d'a Madonne de le Martire (elette protettrice d'a cetate apprisse 'a Uerre de Otranto, ca custò 'nu sacche de vite) se festegge 'u 7 e l'8 settemmre quanne 'u cendre d'u apese se animesce grazie a 'nu sbuènne de bangarelle, luminarie, comblesse musecale e fuèche d'artifiggie. 'A stesse situazione se ripete 'u 11 febbrare pa feste d'a Madonne de Lourdes ca attire 'nu sbuènne de pellegrine.
'U paese festegge 'a Madonne de Lourdes 'u 11 febbrare sie purcé 'a prime apparizione d'a Madonne a Lourdes ha state l'11 febbrare 1858 e pure purcé 'a proclamazione d'a chiesere madre de Pusane cumme "sanduarie mariane" (purcé a 'u 'nderne sue ste 'na grotte artifiggiale ca raffiguresce quedde de Lourdes fatte costruì, pe vote de fede, da 'u miracolate Eggidie Delli Ponti a 'u retorne sue da 'a località frangese) ha state probbie l'11 febbrare 1947.
'U 15 aguste, pa feste de l'Assunzione, le varche de le pescature locale carresciane in mare 'a statue d'a Madonne luènghe bbona parte d'a marine pusanese; passanne pa località "Le Canne", spiccianne 'u eprcorse in località "Mondedarene" addò, purtate sus 'a spiagge ìa statue, avène repurtate jndr'à chiesere "Stella Maris" ca se iacchie nnande a 'a spiagge, sus 'a Litoranèe Salendine. Se festeggiane pure 'a Madonne d'u Carmine e 'a Madonne de le Fiure. Da arrecurdà bbuène bbuène pure, in ambite releggiose, 'u presepe artisteche ca ogne anne 'a Pro loco locale organizze 'mbrà le mure d'a seda soje.
Otre avveneminde
periode estive - congorse de bellezze Miss Pusane
periode estive - Premie Muline Scoppetta pe l'archeologgie 'ndustriale.
periode estive - Fiere d'u Sole, cu le degustaziune de prodotte tipece e esposiziune commerciale. A 'a fiere, ca se tène da 'u 2002, sò presende, apparte a le aziende pusanise e d'u circondarie vicine d'u tarandine, pure otre aziende pugghiese, d'u reste de l'Itaglie e de fore. Se stimane cchiù o mene 100.000 vesitature[27].
periode estive - Pusa Sane, cortèe storeche medievale e combetizione d'u sciuèche d'u puse ("vrazze de firre") 'mbrà le riune.
periode estive - mercatine multietniche a Marine de Pusane in località Le Canne (in passate s'ave tenute pure in località Mondedarene e se proggette 'u trasferimende sue a Lido Silvane).
periode estive - 48hFILMFESTIVAL (congorse a 'u quale partecipane cortometragge luènghe assaije assaije 5 minute e girate in massime 48 ore)
periode estive - Pusane Rock Metal Fest (Esibbizione de gruppe emergende d'u genere).
periode estive - Manifestazione Cetate Apirte, visite guidate a le monuminde.
periode natalizie - presepe artisteche presse 'a Pro Loco de Pusane.
Sciugrafije andropeche
Urbanisteche
Località "Le Canne", Marine de Pusane
'U borghe de Pusane pò essere divise jndr'à ttre zone da le caratteristeche urbanisteche differende:
'u cendre storeche, sviluppate atturne a 'u castelle, se caratterizze pe le vicole tortuose e jè attraversate da vie Costandinopoli[40], 'a strade urbane prengepàle, ca se sviluppe sus 'a direttrice N-S stennute 'nzigne a 'a cetate de San Giorgie Ioniche. Sus a sta vie se allineane le prengepàle monuminde d'u paese, partenne da 'a chiesere matrice sde Sanda Marije 'A Nove ca ne rappresende 'a quinde iniziale. Soprattutte pe stu mutive le mille metre de vie Costandinopoli onne tradizionalmende rappresendate 'u cendre ideale d'u paese, 'a vanne cchiù andiche e vivace d'u cendre. Jedde comungue non ge corrisponne cchiù a 'u baricendre d'u cendre javetate, purcé l'urbanizzazzione irregolare de le anne '50-'60 (v. speculazione edilizie) e 'u programme de fabbricazione d'u 1974 onne fatte sì ca 'u borghe se ave sviluppate prengepalmende verse sud.
'nu quartiere de vecchia urbanizzazzione atturne a 'u cendre storeche, sviluppate sus a strade ortogonale tipeche de le 'nzediaminde uettecendesche meridionale[41] e javetaziune e affiangate, in genere dotate de 'nu orte piccinne de rrete. Jndr'à sta zone recade oramaie 'u baricendre de osce a die suggiale e commerciale d'u paese, ca se cerche jndr'à zone d'u Convende.
l'arèe de recende espanzione, cu strade cchiù larie e isolate spesse regolare, quase 'nderamende de tipe estenzive furmate da villine singole o abbinate cu giardine. Se iacchie jndr'à vanne meridionale d'u javetate, in direzione d'u mare e, a differenze de le arèe cendrale, resulte praticamende prive de arèe pubbleche attrezzate e spazie de socializzazzione funzionande.
'A frazione de Marine de Pusane ha nate partenne da 'u seconde dopeuerre sus a 'nu tessute de monolocale piccinne de cambagne o de case pe pescature, angore visibbele sus a le carte topografeche de l'Istitute Sciugrafeche Militare de inizie '900. Osce 'u 'nzediamende ha state quase tutte 'nglobbate da nuève viale e ville ca costituiscene 'nu unicum urbanisteche luènghe bbona parte d'a coste pusanese.
Reste d'u tessute urbanisteche origgenarie sò presende angore in località Mondedarene, 'a quale organizzazzione viarie arrecorde 'nfatte 'u 'ndriche d'u cendre storeche de Pusane. Le prime ville d'u dopeuerre onne state costruite jndr'à le località Le Canne, Capparone e Mondedarene, mendre a Mondeparasche, 'A Fundane e Pezzarosse se iacchiane le costruziune cchiù recende.
A Lido Silvane se iacchiane ville cchiù granne e lussuose, in parte a 'u 'nderne de Vosche Caggione, nate in granne parte in maniere abbusive e pò sanate seconne le termine de legge. 'U 'nzediamende de Luèchevive nasce jndr'à vanne cchiù occidendale d'a coste de Pusane, lundane da 'u reste d'u javetate d'a Marine de Pusane e, recade in vanne pure jndr'à 'u territorie comunale de Leporano.
Apprimme 'nu 'nu sacche de le riune de sus erane de le contrade de cambagne ma, apprisse l'urbanizzazzione, onne state 'ngluse jndr'à 'u cendre javetate. 'A zone marine e le cambagne onne state divise jndr'à 'nu sacche de contrade. Apparte a le contrade ca donne o pigghiane 'u nome da le spiagge d'a coste (Lido Silvane, Pezzarosse, Spedale Capparone, Mondedarene, Le Canne, 'A Fundane, Luèchevive, ecc.), se arrecordane, 'mbrà l'otre, 'a contrade Vosche Caggione (ca pigghie 'u nome da 'u vosche granne ca se iacchie addà), Villanove, Mondeparasche, 'A Fose e 'A Palate.
Economije
Località "Mondedarene", Marine de Pusane
'U 23% d'a popolazzione de Pusane se dedichesce a 'u settore de le servizie, grazie soprattutte a 'a vocazione turisteche d'u territorie, 'u 22% a 'u commerce, 'u 19,5% a l'agricolture, 'u 18,5% a le istituziune e, 'u 15% a l'industrie (percenduale 'mbrà le cchiù vasce d'a provinge). 'U reddite medie dichiarate jè de 16.340 €, 'nferiore a 'a medie naziunale (18.892 €) ma superiore a quedde reggionale (14.770 €)[43]. 'Mbrà le rame economece prevale quidde d'u terziarie, soprattutte pa vocazione turisteche d'a cetate. 'Mbortande pure le attività commerciale, mandenute da cchiù de 220 ditte e quase 340 addette. Jndr'à le servizie comandane chidde d'a ricettività ('na quarandine)[44].
Agricolture, allevamende e pesche
'A cambagne pusanese jè destinate prengepalmende a 'a coltivazione d'a vite, de l'ulive e d'u grane. Se stime ca 'a produzione de uve ha state de cchiù o mene 70.000 quindale e quedde de alìe de quacche migliaie de quindale[44]. Stonne certe frandoie olearie e ttre candine suggiale, ca assicurescene 'na produzione de 20.0000 ettolitre de vine[44].
Jndr'à le massarie ca se iacchiane jndr'à le cambagne se allevane pecore, mucche e jaddine. 'A pesche jè discretamende sviluppate, ma copre 'nu ruole marginale jndr'à l'economije cetadine.
Industrie
L'industrie copre 'nu ruole picche rilevande jndr'à l'economije pusanese. 'A zone industriale se iacchie in periferie sus 'a SP 109 Pusane - San Giorgie Ioniche e ospitesce soprattutte industrie locale. Se distinguone particolarmende le combarte agroalimendare, carpenderie metalleche e lavorazione d'u legne.
Turisme
'U turisme a Pisane jè 'a prengepale fonde economeche, jè soprattutte de tipe balneare e ave fatte sì ca 'a cetate arrevasse a 'a notorietà. Conde sus a 'na pluralità de strutture ricettive ca assicurescene l'accoglienze de 'nu flusse de 60.000 crestiane[44]. Sò presende 'nu parche acquateche e locale notturne. L'offerte turisteche conde sus a 'na Pro Loco, ca fatie da 'u 1966, e sus a otre associaziune turisteche. 'U turisme storeche e releggiose jè in vie de potenziamende. Jè, cu Castellaneta, 'u prengepàle comune d'a Provinge de Tarde (apprisse 'u capeluèche) pe strutture ricettive[45].
Infrastrutture e trasporte
Viabbilità
'U cendre de Pusane jè attraversate da 'n'arterie prengepàle Nord-Sud ca se chiame Vie Costandinopoli, parte iniziale d'a Strade Provingiale n. 109 ca colleghe'u comune cu 'a cetadine vecine de San Giorgie Ioniche. Sus a jedde se affacciane le prengepàle edificie andiche cetadine e quacche locale commerciale d'u cendre urbane, eppure 'na vanna considerevole d'a vecchie e d'a nova zone 'ndustriale verse Nord.
Se parle de 'na strade de sole 10 m a doppie sienze de circolazione, assaije ausate da 'u traffeche leggere e pesande verse 'u paese e verse 'a marine e quindi dotate de 'nu notevole levèlle de pericolosità[46].
'N'asse urbane perpendicolare a 'a SP 109, ca se stacche affianghe a 'u Castelle e jè pure jidde dotate de locale commerciale, jè Vie Umberto I. Jedde rappresende in realtà 'a vanne iniziale d'a Strade Provingiale n. 112 pe Lizzano, in direzione Est. Pure sta strade, pure in mesure minore, presende levèlle de ause ierte e, quinde, particolare attenziune pianificatorie[47]. 'N'otra strade 'mbortande jè 'a Provingiale Pusane - Leporano, tradizionale vie de collegamende cu 'u cendre de Tarde, fatte da le autobbus de linèe d'a CTP[48]. Urtema direttrice degne de essere nnomenate jè 'a vie pu mare, ca parte da 'a cendrale vie Vittorio Veneto pe arrevà a 's Litoranèe Salendine passanne pu Vosche Caggioni (Strade Provingiale 121). Jndr'à l'anne settande ha state fatte in corrispondenze d'u Cambe Sportive 'na bretelle comunale ca colleghe 'a SP 121 a 'a Litoranèe Salendine presse 'a spiagge "Le Canne", ca avène ausate assaije probbie jndr'à 'u periode d'a staggione.
Jndr'à 'u territorie d'a Marine de Pusane, l'arterie prengepàle jè senza dubbie 'a SP 100 Litoranèe Salenadine, chiamate Viale de le Micenei a 'u 'nderne d'u cendre javetate. St'arterie, costruite quanne ste spiacciavane le anne '50[49], ave ridisegnate 'u 'ndere profile ambiendale d'u territorie costiere joniche oriendale, da Tarde a Leuca. Pure a scapite d'u patrimonie de dune e macchie dunale, osce a die perdute assaije, 'a realizzazziona soje ave favorite 'u 'ngremende de residenzialità, turisme e comunicaziune soprattutte automobbilesteche, assaije ierte jndr'à 'u periode d'a staggione[50].
Apparte a servì da collegamende d assaije comune costiere, l'arterie se occupesce pure de smistà 'u traffeche locale d'a marine de Pusane e resulte assaije congestionate. 'U Piane reggionale de le 'nfrastrutture ave da tiembe definite 'nu proggette de rete 'nfrastrutturale alternative, ca permette 'a penetrazione a le località costiere cu asse ca partene da 'u sisteme de collegamende viarie 'nderne e sus a jidde retornane, 'nderrombenne 'a condinuità de supporte veicolare d'a litoranèe salendine. In particolare, 'na variande a 'a Litoranèe, canusciute pure cumme strade Tarde - Avetrana, se ste costruisce, permettenne a 'a vecchie litoranèe de devendà pedo-ciclabbile, cu 'nu granne beneficie pa rivalorizzazzione d'a coste[51]. Pò 'a restrutturazzione d'a Litoranèe Salendine jè legate none sulamende a le vicissitudine finanziarie d'a Tarde-Avetrana[52], ma pure a 'a previsione de nove infrastrutture portuale a 'nguèdde 'a sede stradale[53], ca potessere jndr'à 'nu future vecine 'ngidere sus a l'efficienze de quidde proggette de restrutturazzione.
Aviosuperficie
Sus 'a provingiale Pusane - Lizzano, in località Mondicchie, stè 'na aviosuperficie. Pò, a 'u 'nderne d'u terrene d'u Municipie se iacchie 'na piattaformepiccenne pe l'atterragge de elicottere.
Idrovie
'U comune de Pusane jè capefile de 'nu raggruppamende de comune pa realizzazzione de 'nu servizie idrovie ca adda permettere de effettuà 'nu gire turisteche luènghe 'a coste oriendale d'a provinge, 'nzigne a Cambemarine de Marugge cu approde jndr'à tutte le prengepale località, 'ngluse Marine de Pusane.
Face pò parte d'u consorzie "Terra Jonica", 'nzieme a tutte le otre comune d'a Provinge de Tarde (tranne Martina Franghe) e, d'u Gruppe de Azione Locale "Colline Joniche".
Sport
Le culure d'a cetate sonde l'azzurre e 'u gialle: le divise de le suggettate sportive pusanise, 'nfatte, sò azzurre (cu le rifiniture vianghe) o, raramende, gialle (cu le rifiniture gnure pe simboleggià l'ape presende sus a 'u stemme comunale). 'U sport cchiù rappresendative jè 'a pallavvole, grazie a 'a quale Pusane ave avute risalte nazionale, arrevanne a sciucà 'a terza serie nazionale.
pa pallavvole, l'Club de le Amatore Volley Pusane ("Vibrotek Volley Pusane" pu nome d'u sponsor prengepàle) ha returnate, jndr'à staggione 2011/12, a sciucà 'u cambionate maschile nazionale de Serie B2 (apprisse 'nu sule anne de assenze) grazie a 'a promozione avute vingenne 'u massime cambionate reggionale, 'a seire C. Apprisse ca avere condotte 'u cambionate de B2 jndr'à vanne medie-ierte d'a classifeche, 'a squadre pusanese adda sciucà angore 'a quarta serie nazionale jndr'à staggione 2012-13. In passato 'u sodalizie pusanese ave sciucate pe diverse anne 'u cambionate de Serie B1 ('a terza serie apprisse l'A1 e l'A2), recendemende da 'u 1995 a 'u 2001; 'u piazzamende megghie megghie, jndr'à stu periode, ha state 'u 6° poste jndr'à staggione 1997-1998. L'Ideal Pusane Talsane, invece, scioche 'u cambionate pugghiese femminile de Serie D.
pa pallacanestre, 'a formazione maschile CS Don Franghe Limongelli Pusane, nate jndr'à 'u 1988, ha arrevate a sciucà 'u cambionate de Serie B Tagliàne e jndr'à 'u 1994-1995 ave vingiute 'u cambionate nazionale sciuvanile allieve. L'aperture de l'anne suggiale avène celebbrate jndr'à chiesere 'u 14 ottommre, sciurne d'a recorrenze d'a scombarse d'u parroche a 'a quale 'a suggettà jè 'nditolate, quanne le uagnune, in tenute sportive, assistene a 'a Sanda Messe CS Don Franghe Limongelli Pusane, su basketpulsano.netsons.org.</ref>. 'A formazione femminile GS Pallacanestre Pusane ave pure jedde raggiunde in passate 'a Serie B. Degne de note jè l'Amatori Basket Pusane, squadre cestistiche pusanese apprime d'a suddette Limongelli, da 'u 1969 a ' u 1992.
Ave operate sus a 'u territorie pure 'a New Basket Pusane e, jndr'à 'u 2012, ha nate 'a Fortitudo Pusane. Pe quande reguarde le cambionate studendesche, pò, 'a Scole Medie "De Nicola" ave vinde, jndr'à 'u 2002-03, 'u titole tagliàne.
pu ballone a cchiù 'mbortande suggettà pusanese ha state 'u Fibal Pusane ca jndr'à 'u cambionate 2008-09 apprisse ca avere conguistate 'a Coppe Pugghie ha state ridenominate ASD Leporano e s'ha trasferite jndr'à 'u vecine comune pe probbleme de aggibilità d'u cambe sportive Guida de Pusane. Da 'u cambionate 2001-12 Pusane ave avute arrete 'na squadre de ballone, 'u Real Pusane ca ave sciucate addò sciucave 'a Fibal: in Prime Categorije. 'U Real Pusane, apprime, se occupave sulamende de formaziune de uagnune. Apprisse 'a retrocessione, subbite a le playout, 'u Real Pusane scioche 'a staggione 2012-13 in Seconde Categorije.
pu touch rugby, jndr'a cetate ave sede 'u Liune Ruggende Pusane, une de le 14 squadre iscritte a 'a Federazione Tagliàne Touch Rugby.
pu puggilate, jè presende a Pusane 'a Puggilisteche Merico.
'A spiagge Mondedarene ha state cchiù vote sede de 'na tappe d'u cambionate tagliàne de beach volley. Pò, sembre a Marine de Pusane, ave avute sede 'na tappe d'u Trofeo Tre Mare, 'mbortande tornèe veliche d'u Mezzoggiorne. A Lido Silvane spicce 'a "Coppe de le Micenei", trofèe veliche ca parte da Tarde.
'A quarte e urteme tappe d'u Gire de Pugghie 1997, 'u 3 ottommre, partìe da Pusane e spicciò a Martina Franghe cu 'a vittorie de Sergio Barbero[55].
Imbiande
'Mbrà le imbiande sportive comunale ste 'u palazzette d'u sport "Franghe Alfarano" cu 'nzeccate 'a piscine comunale "Giuliano Musciacchio", 'u cambe sportive "Franghe Guida" cu piste de atletiche, 'u "Pallone Tensostateche", 'na piste de go-kart e strutture minore.
Tradiziune
'U sciuche d'u "vrazze de firre" otre no jè ca 'u "sciueche d'u puse" da 'u quale, seconde le storece, ave pigghiate nome probbabbilmende Pusane ("puse sane" = "puse forte"). Jndr'à l'andichità 'u sciueche ere assaije diffuse 'mbrà le crestiane d'u luèche e, successivamende, se diffuse pure 'mbrà le leggionarie ca soggiornavane a Pusane. Pò tornèe de puse sane avenèvane fatte da benestande romane in diverse occasiune. Le tornèe de puse sane revivene angore osce a die, jndr'à staggione, grazie a l'omonime manifestazione "Puse Sane": a sfidarse sò le uette riune pusanise. 'A manifestazione jè precedute da sfilate in abite medievale cu sciocoliere, sbandierature e cu 'a presenze d'a Trombe Araldiche de Pusane. 'A sfilate rievoche 'n'avvenimende d'a storie pusaneme: jndr'à 'u 1407 'a pringipesse de Tarde e condesse de LecceMarije d'Enghien (vedove d'u pringipe de Tarde Raimonde Orsini Del Balzo, a 'u quale 'u matrimonie Falcone De Falconibus avenìe chiamate a essere testimone[56]) e l'angioine re d'u Regne de Napule Ladislao de Durazzo, neo-spose, apprisse ca avèrene passate 'a prima nuttate de le nozze jndr'à 'na case in possesse de Marine De Falconibus jndr'à cetate vecchie de Tarde, raggiungerene in viagge de nozze 'u feude de Pusane ospite d'u stesse barone Marine (segretarie de Giuanne Andonie Orsini Del Balzo, figghie d'u defunde Raimonde e de Maria d'Enghien), soggiornarene jndr'à 'u castelle, 'ngondrarene aqquà le barone d'u Salende, se devertirene cu 'a cacce a 'u cinghiale e passeggiarene lunghe le vie cetadine assistenne, in serate, a sifde de sciuèche d'u puse 'mbrà certe surdate pusanise e le cchiù valorose cetadine[15]; angore osce a die, jndr'à rievocazione storeche, 'u re e 'a reggine fanne 'na passeggiate lunghe le strade pusanise partenne da Chiazze Castelle e facenne retorne a 'a stesse, addò osservane 'u tornèe de puse sane. 'A manifestazione "Pusa Sane", ca se tène da 'u 1982, ave avute jndr'à 'u 2009 'u granne recanuscemende de essere state 'nzerite jndr'à 'u Radune de le Cortèe Storece Medievale ca se tène, ogne anne a settemmre, a Gravina in Pugghie[57].
A Pusane jè attive 'u comblesse bandisteche "Leonardo Colizzi - Cetate de Pusane" presende jndr'à maggiorparte de le manifestaziune popolare pusanise e d'a provinge joniche. 'U nome jè dedicate a 'u stimate Maestre Leonardo Colizzi ca avìe 'a cure e 'a passione de 'nzegnà 'a museche popolare da le anne d'u dopeuerre 'nzigne a le urteme sciurne d'a vita soje.
Famose assaije jndr'à 'nu sacche de arèe d'u Salende jè 'u cunde d'a "zirte de Pusane" ("la zita ti Pusanu")[58]. Ne nasce 'u muttette "E' accappate cumme 'a zite de Pusane" ("E' 'ccappata comu la zita ti Puzanu"), a indicà 'na persone ca reste a vocche aperte pe 'nu fatte assaije agognate, ma pò avverate jndr'à 'nu mode combletamende diverse da cumme se l'avere aspettate.
Pusane jndr'à otre parte de l'Itaglie
San Giuanne da Matera, apprisse ca avere vissute a Pusane, se ne scìe jndr'à 'nu monastere vecine a Monde Sand'Angele, sus a 'u Gargane, in Provinge de Fogge, e 'u trasformò jndr'à l'Abbazzie de Sanda Marijen de Pusane, ca ha state une de le cchiù 'mbortande d'u sud Itaglie. Pure 'a contrade, addò se iacchie l'abbazzie, ave pigghiate 'u nome de "contrade Pusane" e le doje strade pe arrevà (une da Monde Sand'Angele e l'otre da Manfredonia) onne pigghiate 'u nome de "vie Pusane".
Bibbliografije
Altamura Alberte, C'era una volta Pulsano, Barbieri, Manduria 2001
De Marco Andrea, Pulsano nei tempi, Congedo 1986
Gorgoglione Mariandonie (a cure de), Strutture e modelli di abitati del Bronzo tardo da Torre Castelluccia a Roca Vecchia, Filo, Manduria 2002
Pulieri Margherita, Il Santuario Nostra Signora di Lourdes, Graphica Sud, San Giorgie Ioniche 1996
Schirano Italo, Nella seconda metà del Settecento
Spinosa Mario, collana I Tascabili di Pulsano (opera quadrupla contenente: I Tesori della Magna Grecia, Le Fiere e i Mercati, Le visite pastorali e Giovanni Antonio De Falconibus)
Spinosa Mario, Il Convento di Pulsano, 1985
Spinosa Mario, Storia di tre monumenti, 1986
Spinosa Mario, La Cappella rurale del SS. Crocifisso, 1989
Spinosa Mario, Pulsano nel '700, Schena, Fasano 1992
Spinosa Mario, Muscettola, 2003
Tomai Salvatore, San Trifone Martire, Omphalos, Pusane 2000
Turco Dina, Pulsano... a spasso per la storia, 2000
↑F.Porsia - M.Scionti, Taranto, (Le Città nella storia d’Italia) Laterza, Rome-Bare, 1989
↑A 'u 'nderne de l'isole amministrative tarandine, assaije attività commerciale specificane, jndr'à l'indirizze lore, de acchiarse a Marine de Pusane o a Marine de Lizzano.
↑'N'elenghe de le prime emittende tarandine nate jndr'à 'u 1978 se pò 'ndrucà sus 'a vôsce Cendre Direzionale Beni Stabili Tarde, edificie addò erane localizzate 'nu sbuènne de studie radiotelevisive
↑'u nome d'a strade face riferimende a 'a chiesere d'a Madonne de Costandinopoli, scettate 'nderre jndr'à 'u 1874 pe putè permettere 'a costruzione d'a strade pe San Giorgie Ioniche
↑Case vicinitorie assaije famose sò 'u Borghe de Tarde e 'u rione Murat de Bare de età napoleoneche
Itaglie
Pugghie
Tarde
.svg)
