Vitu Maria Amicu Statella (Vito Maria Amico 'n talianu) nascìu a Catania lu 15 di frivaru 1697 e murìu a Catania a lu 15 di dicèmmiru 1762. Era figghiu di Vitu Amicu, e Anna Statella; Patri e matri èranu di famigghia nòbbili catanisa, e fu pri chissu ca Vitu già di carusu vinni nnirizzatu ô stùdiu e a lèggiri. Ma Vitu era macari pigghiatu dô sò dâ passioni pâ canuscenza e, forsi, fu pi ssu mutivu ca quannu avìa ancora sìdici anni, ntô 1713, trasìu ntô cummenttu binidittinu di Santu Niculò l'Arena di Catania, pi mintìrisi la vesti di mònucu binidittinu.
A trentaqauttr'anni addiventau priuri dû cummentu e, doppu Catania, vinni numinatu riggenti dê cummenti di l'Òrdine binidittinu di Missina, Militeddu, Casteddubbonu e Murriali.
La sò passioni pâ canuscenza lu purtava a frinquintari posti unni putìa attruvari nutizzi supra la storia dâ Sicilia: si s'avìa a fari na passijata, era p'arricògghiri campiuni di lava nta l’ Etna, oppuru fòssili ntô tirritòriu di Militeddu, cuggheva matiriali di scavu, comu ciràmichi, vasi, midagghi, pri dariccilli ô Museu di antichitati grecu-rumanu, misu ô ciancu dâ Bibbliuteca, ca iddu stissu, aiutatu di patri Scammacca, avìa funnatu. Nta picca tempu lu Museu era chinu di rari ritruvmenti epigràfichi e numismàtichi.
Quannu eppi la nòmina a cattidra di stòria civili nta l'universitati di Catania, funnau la prima bibbliuteca pùbbrica catanisa.
Fu Priori di 25 munasteri e macari Abati e vinni numinatu di
Carlu III "Riggiu Istoriògrafu" cu nu diproma dû 1751.
