Geböärnisse

• In dän Loop fon dät Jier 2022 rakt dät eerstmoals moor as oachte Milliarden Ljuude ap ju Waareld.

• 24. Februoar: Rusken Uurfaal ap ju Ukraine: Ruslound bräkt dät Oukuumen Minsk II un gript in een groot ounlaide Invasioon ju Ukraine oun.
• 27. Februoar: In Butscha konnen do Ukrainiske Ferdäägenere een heele ruske Militärkolonne mäd Pansere un aal fernäile.
• 31. Meerte: Unner dän Druk fon do Ukrainiske Ferdäägenere mouten sik do ruske Troppen uut ju Stääd Butscha noudwäästelk fon Kyjiw touräächluuke. In ju Foulge wäd bekoand, dät do Russen in ju Stääd woalloos hunnerde Zivilisten doodskeeten hääbe.

• 8. April: Ätter moorere Deege fon dät Touräächwieken mouten sik do ruske Oungriepere unner dän Druk fon do Ukrainiske Ferdäägenere uut dät Noude fon ju Ukraine heel touräächluuke. In't Aaste un Suude fon dät Lound häd Ruslound moor Ärfoulch.
• 13. April: Ukrainiske Striedkrääfte skjoote dät ruske Kriechsskip Moskwa mäd Raketen in Bround. Do Russen fersäike, dät Skip ou tou sliepen. Aan dai leeter wäd fon ruske Siede bekoand moaked, dät dät in aan Stoarm unnergeen weese skäl.

• Suumer: Druuchte un Hatte in Europa - Die Suumer 2022 is die heetste Suumer sänt Begin fon do Weeder-Apteekengen. Ju Katastrophe faalt truch dän Globoale Woormenge so stäärk uut.

• 8. Juli: Twäin Deege foar ju japoanske Bupperhuuswoal wäd die fröiere Premierminister Shinzō Abe ap eepene Sträite in Nara doodskeeten.
• 8. September: Ju britiske Köänigin Liesbet II. (Elizabeth II.) stäärft ätter moor as soogentich Jiere Regentskup. Näien Köänich wäd Koarl III. (Charles III.).
• 16. September: Jina Mahsa Amini, een jung kurdisk Wieuw uut dän Iran stäärft, ätterdät ju fäästnuumen wuude. Fermoudelk hääbe do Dreguunere hier dood häuwen. Gruund foar ju Fäästnoame is, dät ju dät Kopdouk nit gjucht drain hääbe skäl. Ju Ättergjucht fon hieren Dood fiert tou een groote Protäst-Bewäägenge unner dän Woalspröäk Wieuw, Lieuwend, Fräiegaid, die uut dän linken kurdisken Feminismus kumt.
• 8. Oktober: In dän Rusk-Ukrainisken Kriech kumt dät tou een of moorere Explosionen ap ju Krim-Brääch uur ju Sträite fon Kertsch, ju ju rusk besätte Krim mäd Ruslound ferbindt. Dät rakt grooten Skoaden oun ju Brääch, do Russen bruuke moorere Mounde, uum ju Brääch fulstoundich wier apsteede tou brangen.
• 30. Oktober: Bie ju Präsidentskups-Woal in Brasilien sät sik die linke Politiker Luiz Inácio Lula da Silva mäd 50,9 % fon do Stämmen juun Boantje-Hoolder Jair Bolsonaro truch.
• 11. November: In dän Rusk-Ukrainisken Kriech konnen do Ukrainiske Ferdäägenere dät gjuchte Ouger fon ju Äi Dnipro mäd ju Stääd Cherson befräie.

Stuurwen

• 14. Januoar: Alice von Hildebrand, belgisk-US-amerikoanske roomsk-kathoolske Theologinne un Philosophinne
• 8. Juli: Shinzō Abe, japoansken Politiker un fröieren Premierminister
• 30. August: Michail Gorbatschow, die lääste Präsidänt fon ju unnergeene Sowjetunion
• 8. September: Liesbet II. (Elizabeth II.), Köänigin fon dät Fereende Köänichriek
• 16. September: Mahsa Amini, iranisk-kurdisk Offer fon Dreguuner-Gewalt
• 31. Dezember: Benedikt XVI., emeritierden Poabst