Ene ricepeure, c' est ene plaece ki les mots s' côpèt, po ndè mete ene mitan so ene roye, et l' ôte mitan so l' ôte.
Les rcepeures ni s' fijhèt nén pareymint dins totes les langues.
L' eployaedje di programes aspougneus d' tecses atûzlés e francès ou e-n inglès dinèt pacô des laidès rcepeures dins les scrijhaedjes e walon.
Sacwants rîles po les rcepeures do walon
[candjî | candjî l’ côde wiki]- on n' côpe nén les mots a on pî.
- on n' côpe måy ene cossoune ki si scrît avou deus letes : ch, tch, dj, gn; såf ss, ki s' ricepe e mitan.
- on n' côpe måy ene voyale ki si scrît avou deus letes : ou, oû, an, in, on.
- on n' côpe måy on betchfessî scrijha di deus ou troes letes : xh, jh, sch, sh, oe, oi, oen, ai.
- on mete voltî li rcepeure inte deus cossoune : hantch·ler, e·cay·té.
- ôtmint, po les sillabes å lådje (ki s' atchevèt pa des voyales), on mete li rcepeure dirî l' voyale : ri·tchô·kî
- on n' ricepe nén voltî (mins on l' pout fé) on mot ki l' prumî pî n' a k' ene lete : atnantes.
Egzimpes di manaedjmint des rcepeures dins les scrijhaedjes e walon
[candjî | candjî l’ côde wiki]Dins l' roman "Vera, gn a sacwants målès rcepeures :
- måscôpaedje do betchfessî jh : roej·hén (p. 95); plaij·hante (p. 97); bénfj·hance (p. 107)
- måscôpaedje del lete "tch" : råt·chåds (p. 95); brot·chî (p. 153); saet·chaedje (p. 323)
- måscôpaedje del lete "dj" : goird·jon (p. 173); rcand·jive (p. 249)
Ces deus dierinnès mwaijhès rcepeures la sont-st eto foirt corantes dins les scrijhaedjes e sistinme Feller.
Å rvier, dins l' roman "On Sånî a pårt, k' a stî eplaidî pal S.N.R. «Li Rantoele», ey eployî èn aspougneu d' tecse la k' on tchoezixh les rcepeures, ele sont tertotes djusses.
Ricepeures sol Wiccionaire walon
[candjî | candjî l’ côde wiki]Dispu l' moes d' avri 2013, li Wiccionaire walon dene pacô li rcepaedje des mots. Soeye-t i dins l' prononçaedje (e-n AFE (avou on pont ordinaire), soeye-t i djusse après, dins ene roye lomêye "ricepeure" (avou on mîtrin pont, ou on pont ordinaire).
Egzimpe pol mot «ricepeure»
- Prononçaedje : /ʀi.sɛ.pøːʀ/
- Ricepeures : ri·ce·peure
Po deus sillabes ki n' si dvèt nén rceper, on mete on pont inte åtchetes:
- el(.)zès → elzès
- djel(.)zès → djelzès
- blan(.)kès → blankès
- o(.)ran(.)djès → orandjès
- djin.te(.)yès → djin·teyès
- a(.)mis.tå.vis.té → amis·tå·vis·té