Bumang | |
---|---|
Patubo iti | Tsina |
Rehion | Yunnan |
Etnisidad | Manzhang Dai |
Patubo a mangisasao | 200 (2007)[1] |
Kodkodigo ti pagsasao | |
ISO 639-3 | bvp |
Glottolog | none |
ELP | Bumang |
Ti pagsasao a Bumang (Insik: 布芒语) ket ti maysa a paaweng a pagsasao nga Austroasiatiko ti Yunnan, Tsina. Daytoy ket insasao babaen dagiti agarup a 200 a tattao idiay Manzhang 曼仗, Distrito ti Mengla 勐拉地区, Kondado ti Jinping, Prepektura ti Honghe, Yunnan, Tsina. Ti Bumang ket kabarbaro a naduktalan babaen ni Dao Jie ti Insik a lingguista kadagiti tawen ti tengnga a 2000. Daytoy ket asideg a kabagian ti Kháng (Edmondson 2010).
Ikeddeng ni Jerold A. Edmondson (2010) ti Bumang ken ti asideg a kabagianna a pagsasao a Kháng a kas sasao a Khmuiko gapu iti leksikal nga ebidensia, bayat a ni Dao Jie 刀洁 (2007) ket isingasingna a ti Bumang ket mabalin a maysa a pagsasao a Palaungiko.
Uray no ti Bumang ken Mang ket addaanda iti agpada a nagan ken naisasao isuda a dua idiay Prepektura ti Honghe ti Probinsia ti Yunnan iti Tsina, saanda nga asideg nga agkabagian ken saanda nga agparang iti agpada a sanga (Edmondson 2010). Bayat nga ikeddeng ni Edmondson a ti Bumang ket mabalin a pagsasao a Khmuiko, ti Mang ket saan, ken as-asideg daytoy a kabagian dagiti pagsasao a Bolyu ken Bugan iti akin-abagatan a Tsina.
Ti autonimo ti Bumang ket bu˨˦maŋ˨˦ (Dao Jie 2007). Idiay Tsina, ti Bumang ket naidasigda a kas parte ti pakipagilian a Dai. Dagiti agsasao iti Bumang ket napalikmutanda kadagiti agsasao iti Puraw a Tai (Tai Don), Nangisit a Tai (Tai Dam), ken Pu'er Dai. Dagiti kawwes ti babbai a Bumang ket kapada iti Kháng, Ksingmul, Puraw a Tai, ken Nangisit a Tai (Edmondson 2010).
Iti kaunegan ti Manzhang 曼仗,[2] Distrito ti Mengla 勐拉地区, naisasao ti Bumang idiay Shangmanzhang 上曼仗 (kadagiti 22 a sangkabalayan; nga ammo iti pagsasao a Bumang a kas ban˩˨jau˥˩) ken ti Xiamanzhang 下曼仗 (kadagiti 49 a sangkabalayan). Ti Shangmanzhang 上曼仗 ket mabirukan iti Purok ti Tiantou 田头村, Ili ti Mengla 勐拉乡, bayat a ti Xiamanzhang 下曼仗 ket mabirukan iti pinatpataray ti estado a plantasion ti goma (国营橡胶农场) (Dao Jie 2007).
Dagiti Bumang ket nagtaudda manipud iti tattao a Kháng nga immakar manipud idiay Bietnam kadagidi tawen ti 1800 (Edmondson 2010:139).
Kasla iti Kháng, ti Bumang ket maysa a paaweng a pagsasao.