ZE
|
Quésta pàgina a l'é scrîta in léngoa zenéize
![]() A Grafîa adeuviâ a l'é quélla de l'Académia Ligùstica do Brénno |
A Maria Terrile Vietz (Zêna, 27 de zenâ do 1926 - Zêna, 29 de frevâ do 2016) a l'é stæta 'n'atôa de tiâtro e scritôa lìgure. Sorvenominâ "a regìnn-a", a l'é stæta a figurànte ciù avoxâ do tiâtro in zenéize da segónda meitæ do Nêuveçénto[1][2][3][4].
A Maria Terrile Vietz a l'é nasciûa into 1926 a Sàn Pê d'Ænn-a[5], pròpio inte l'ànno da sopresción de quéllo comùn aprêuvo a-a creaçión da coscì dîta Grànde Zêna. A l'à comensòu a sò ativitæ tiatrâle into dòppo goæra sott'a-a goìdda de l'Emilio del Maestro ma, in particolâ, l'é stæto a colaboraçión co-o Vito Elio Petrucci e o sodalìçio artìstico con lê a dâghe ciù nominâta e popolaritæ[2][4].
A Vietz a l'é stæta a protagonìsta de ciù de vìnti òpie tiatrâli[6], sorviatùtto de comédie, e into méntre a fâva da divulgaçión colturâle in sciâ Rai e pe Telegenova, fàndo a condutôa pe quàrche ànno de 'n progràmma da demôa e informaçión ascì[6]. Pi-â sò ativitæ d'atôa a l'à goâgnòu bén bén de prémmi tiatrâli e colturâli, cómme o Prémmio Regionâle Lìgure, o Prémmio Naçionâle Tiatrâle R. Mazzi, o Prémmio De Martini e o Melvin Jones Fellow a-a cariêra pò-u sò inpégno inta difuxón da léngoa lìgure. Pe quatorz'ànni a l'à avûo a càrega de viceprescidénte de l'asociaçión A Compagna, dond'a l'é stæta a prìmma dònna a crovî de càreghe de govèrno[2].
Inte l'ànno 2003 a l'à fondòu 'n'asociaçión dedicâ a-o Petrucci, ch'a l'àiva a sò sède inta Bibliotêca Lercâ de Vìlla Inperiâle, con l'òbietîvo de mostrâ e d'avardâ o zenéize[2][6]. Into 2007 a l'êa candidâ a-o conséggio comunâle de Zêna, inte lìste do MIL[5]. Tra o 2008 e o 2011 a l'à travagiòu co-o cîne ascì, pe-i doî capìtoli de comédie de Capitàn Baxaicò sott'a-a direçión do Massimo Morini.
Into 2012, con l'Erga Edizioni, a l'à publicòu o lìbbro Fregogge de pan pöso, quàddro d'época e coltûa ligùstica, e l'ànno dòppo o Matrimonio di Guerra, dónd'a pàrla sorviatùtto da vìtta tra a segónda goæra mondiâle e o dòppo goæra. A sò ùrtima òpia a l'é stæta a registraçión, co-o Piero Campodonico, de l'Enéide in zenéize, fæta in sciâ bâze da traduçión do 1895 do Nicolìn Baçigalô e publicâ in dvd[7][8].
A Maria Terrile Vietz a l'é mancâ a Zêna into frevâ do 2016, o méize dòppo ch'a l'àiva conpîo nêuvant'ànni[1]. Pe sta raxón chi, into méize d'òtôbre de quéllo ànno a l'é stæta aregordâ co-in spetàcolo e 'na móstra de fotografîe a-o Tiâtro Caignàn, co-a partecipaçión do Luca Bizzarri[9].
Contròllo de outoritæ | VIAF (EN) 36167759644313570822 · SBN (IT) LIGV032431 · WorldCat Identities (EN) 36167759644313570822 |
---|